1. WONG
MLARAT
Wong mlarat kesrakat
iya wae
wong sugih ya kesrakat
ora wae
iya wae
sing kesrakat budine
sing kesrakat welas asihe
sing kesrakat jiwane
sing kesrakat kamanungsane
Kesrakat
wong sugih padha adu rosa
rebut panguwasa numpuk bandha
wong mlarat padha adu rasa
rebut pangimpen numpuk
pangentha-entha
iya wae
datan kendhat
nganti sekarat
2. PENGET
1
Dina wingi wus
lungse
sabarang gawe
daksigeg daktali
lawe
datan dakrungu
panjerite ati
wanodyayu
ngumbar
panantang
ngesok
panandhang
nganti
kedharang-dharang
marang ati
lanang
sing wis tinggal
glanggang
medhot kapang
Iki dina, gagat
raina
srengenge kang
prapta nggawa crita papa cintraka ing wingi dina
gumanti sih
tresna kang nyajiwa
nyawiji mecaki
garising wadi
wewadining Gusti
kang wis kinodrat kudu diugemi
Gagat raina,
dudu panalangsa
nalika, jenthik
manis wus rinengga kalpika
nalika, kekarone
angregem asta
nalika, kekarone
angucap setya
dumeling
swara-swara donga
njalari sirna
sakabehing pangudarasa
Iki dina, dadiya
penget utama
“Sihing priya
nedya manunggal ing jiwa”
nyawiji, bakal
kekanthen lumaku ing bebrayan suci
kan linambaran
bekti sejati
3.
PENGET 2
Ing kene, ana
tembung sing arep daklairake
nalika atimu wis
gilig arep mapag lelakon
jagad iki
jembar, gumelar kebak gebyar
aja kongsi
mandheg, yen durung tekan purwaning gegayuhan
Wis ben...
si Kembang desa
urip ing alaming kaprasajan
tetembangan
lelagon megatruh kang marikelu
sajak nggembol
teges sinandhi
arep blaka, ing
ati malah saya nelangsa
kinunjara kodrat
sing wiskadhung sinurat
Enggal budhala!!
papagen
lintang-lintang abyor
sing bakal bisa
ngrenggani uripmu
galo...
dinane lumaku
saya banter
aja nganti
kelangan lacak
kedhisikan
jumedhule rahina
Ing tembe...
isih ana kembang
desa liyane, kang siyaga mapag kasetyanmu
4. GURIT
KAPANG
Galo kae teka!
sapa?
anak lanang
sing wis
kinudang
dening wong
tuwa, sanak lan kadang
jengkar ngluru
piwulang
kareben bisa
ngluwari panandhang
Gondhelane mung ijazah sing kanggo
kanca
uga donga-donga saka wong tuwa,
tangga, rowang mitra
kanthi pangarep-arep bisa sembada
kacekel sabarang kawruh utama
kanggo ngudhari ruwet renteng supaya
sirna
Anak lanang,
oh... anak lanang
galo kae teka,
si anak lanang
gage papagen
kanthi esem manis
papagen
pangarep-arep kanthi polatan aris
nanging...anak
lanang, oh...anak lanang
geneya kowe
nangis, endi kawruh saka para winasis
kabeh wis
ngrantu, enggal babarna aglis
Anak lanang ora kuwawa ngronce ukara
yen dheweke wis kebak dosa, nyelaki
donga
ing kana, mung ngumbar nepsu duraka
memitran lan panguripan nistha
nganti gegayuhan sakawit sirna
Oh...Anak lanang, luput ing kekudang
ambruk njepapang
wong tuwa, sanak lan kadang
kabeh kekitrang
ing antarane gela lan wirang
5. CATHETAN
NALIKA UDAN SEPISANAN
Kaya raina wus
lungse
sumusul tekane
sore
daksawang...
ing tawang...
kekembeng waspa
ing salumahing netra
sajak bakal
ngesok panandhang
sing neba nebah
karang
ngelingake
yen urip iki,
pindha keplasing thathit
mung sawetara...
O... ana udan
udan sepisanan
nggawa larahaning batin
uga laraning kenya
sing katemben koncatan tresna
Udan sepisanan
pancen dudu
impen
O... dakaras
aruming lemah teles
sing sumebar
tanpa wates
ing ati apes
ing ati pepes
dadi angles
Udan sepisanan
sing kasok ing bumi
sajak nggembol wadi
wadining katresnan jati
sapa sing ngerti??
yen sliramu selak, cidra tan ngugemi
marang janji kawuri kang wis ingucap
ing lathi
“Nedya nyawiji, mecaki bebrayan
suci”
Udan sepisanan
gawane cathetan
iki
tekan samodra
sadraning
kawicaksanan
samodraning
keadilan
ing anggamu
Nalika udan sepisanan
aku nate nyathet maewu-ewu
pangarep-arep.
6. KAPAN
BISA LUWAR
Yen ora kanthi
bengok-bengok
ora bakal
manjing sajeroning tembok
nyuntak prakara
sing suci nganti sing bobrok
kabeh supaya
cetha lan ketok melok-melok
Yen ora kanthi
rame-rame
ora bisa wawan
rembug ing sajeroning bale
nyuntak
panandhang sing ngrante jiwa ragane
supaya ora
kedlarung-dlarung dadi kere
Ngono ya ngono,
nanging mbok ya aja ngono
Aja dupeh ana
kalonggaran banjur padha tranyakan
aja dupeh ana kalodhangan
banjur padha jag-jagan
turut dalan,
bengok-bengok ninggal sopan
elinga, wong
berbudi iku kudu empan papan
kuwawa nyidhem
nepsu lan njunjung tatanan
salwir prakara
bakal bisa sidhem tanpa ana tuwuhing korban.
7. PASEKSEN
Ora kaya ing
wengi iki
rembulan mesem
sajak mbudidaya nyingkirake lelakon surem
sajak mbudidaya
nyingidake crita kucem
Dhek wingi wis
dadi seksi
tumrap samirana
sing ngumbar birahi
ngrudapeksa
tetuwuhan kang nedheng semi
ginawa kendhang
ninggalake bumi
lan anehe oara
ana sing padha wani nglari
Rembulan malih
ngguyu
peseksene datan
ana sing gelem ngrungu
sing pener dadi
kleru
sing kleru padha
ditiru
malah digugu
mandhes tekan jroning kalbu
Rembulan mesem
Rembulan ngguyu
Rembulan nangis
kepriye bisa
ngestarekake esem manis
yen saisine
jagad padha amung lamis
yen saisine
jagad padha dadi wengis
yen saisine
jagad padha kekejer nangis.
8. YEN
MANUK DARA KELANGAN KATRESNANE
Aja kokcoba ngarih-arih
marang manuk
dara sing kapedhotan sih
atine wis
kebacut perih
ketaton nganti
kasatan getih
Coba waspadakna
si dara
kekitrang nglari tresna sing wis karegem kanthi peksa
nganti wulune
sengkleh datan rinasa
sing ditampa ya
mung crita duhkita
Batine njerit,
arep nangis
nanging wis kentekan luh
arep adul marang
pang ringin wis ora saguh
arep mulih
menyang pagupone wis katerak angin nganti rubuh
sing ngerti
padha mitambuh
ethok-ethok ora
weruh
Aja kokcoba aweh
pitulung
marang si dara
sing wis kebacut mutung
atine njethung
pikire bingung
anane mung
pasrah ngenteni timbalane Hyang Agung.
9. PANGUDARASA
Kepriye ora
keranta-ranta
yen nyatane
kedadeyan iki nyata cetha wela-wela
kabeh padha alok
sora
sora....sora.....lan
sora....
jare kanggo
kamulyane para sudra
kanggo nutup
jurang kemlaratan kang bengkah amba
antarane si
sudra lan si pideksa
Oh...
jebul mung swara
sepa, sing gemontang ngebaki angkasa
kanggo samudana
anggone padha nglelemu raga
si sudra panggah
papa ginedhong rasa cuwa
bola-bali ya
mung si pideksa,
sing
tetandhingan ngoyak panguwasa
10. SESAWANGAN
Galo kae
sawangen!
gedhong magrong-magrong
kebak uwong
sing teka ing
kana padha nggawa amanat nganti pirang-pirang kanthong
kang bakal
dionceki, ditata lan digotong
ben para kawula
bisa lega lan ing dhadha dadi plong
Lho...lho...
galo kae
sawangen!
kok ya isih ana
sing mung meneng cep klakep
lungguh jegang sedhen
kursi tangane sedhakep
sajak ora nggape
marang amanat sing didadekake pangarep-arep
Wis ora usah
disawang!
mundhak ati
kebranang
luwih becik
sengkut tumandang
ngadhepi
panandhang kanthi pikiran padhang.
11. KEKUDANGAN
Anakku lair ora
ginedhong cindhe sutra
gedhonge mung
salembar katresnan kang nyawiji karo jiwane
turune ora
linambaran babut kencana
lambarane mung
larikan-larikan donga kang ngancani ragane
Oh Ngger...
aja kaduwung
marang kedadeyan sing wis kinodrat
urip sing sejati
iku sing bisa nindakake amanat
ing donya iki
mung sakedheping netra
nanging kok ya
talah temen...
urip sing mung
sedhela tansah kinancan esem sepa
biyungmu ora
kuwawa nyandhing raja brana
awit panguripane
wis kinunjara ing sajroning jaman mardika
Ngger...
lumakua anut
garising pepesthen
aja nganti
nalisir menggok nganan ngering
biyungmu mung
nglumpukake donga
kanggo sangu
nggayuh urip mulya.
12. DONGA
Dakrapal
dzikirku aneng sandhuwuring sajadah
nalika ragau
semplah
nelukake angkara
nyidhem pitenah
sing nyoba
ngreridhu marambah-rambah
aku mung bisa
pasrah
Dakrapal maneh
dongaku aneng pungkasaning sembahyang
panyuwunku bisaa
enggal menang
katekan kabeh
sing digadhang
panandhangku
bisa sirna ilang
dalan nasib bisa
dadi sumilak padhang.
13. YEN
SI BINTIT AWEH SASMITA
Manuk bintit
kekiter ing sepining wengi
aweh sasmita
supaya padha ngati-ati
jaman saiki akeh
durjana apengawak priyayi
sing didhustha
ora mung wujud raja peni
nanging wis
gelem ndhustha jatining dhiri
Manuk bintit kekiter
ngumbar swara nganti blero
aweh sasmita
marang wong sing kinodrat bodho
aja padha gelem
diedu kaya jago
saben pecak kudu
manut botoh kang wengise ngungkuli algojo
yen kasoran
banjur diina lan dipaido
Manuk bintit
sajak kesel banjur mencok ing pucuking pring
atine mrinding
nyekseni polahe durjana sing ora eling
ndhustha apa wae
tanpa tedheng aling-aling
Oh....
donyane lagi
gonjang-ganjing.
14. ENDI
PANGRASAMU
Yen nyawa wis
ora ana ajine
banjur apa sing
arep dipamerake
kawengisan sing
jejogedan ing madyaning panalangsa
Endi pangrasamu
dudu sanak dudu
kadang yen mati melu kelangan
O... jebul wis
luntur
sanak kadang wis
ben mati nemu warisan
Manungsa...manungsa
tega temen
anggonmu nggadhekake kamanungsanmu
mung saderma
ingijolan sega sapulukan
lan saderma
lungguh ing klasa gumelar.
15. SADAWANE
DALAN
Sadawane dalan
daketung
larik-larik pranatan
tansaya bingung
milah perangan
mbaka perangan sajak uwal saka petung
Apa isih adoh?
kamangka
jangkahku saya sayah
ragaku saya
lungkrah
Apa ya bakal
pasrah?
sanajan tetep
ginedhong susah
Sadawane dalan
aku mung bisa
nyawang
kanthi rasa was
sumelang
marang perangan
mbaka perangan sing saiki wis kendhang.
16. WARISAN
Pangarep-arepku
cabar
dakgegadhang
warisane Sang Aji Saka bakal mekar
ngrembaka,
karengga sunar kang gumebyar
jebul mung impen
rahina
aja maneh kok
ngeja larikan-larikan ukara
ndumuh ha lan la
wae wis ora kuwawa
Ah...
sapa sing luput
yen anak turun
wis ora kepencut
ngrangkul
warisan adi wis ora gumregut
wusana warisan banjur
kerut
kedharang-dharang
tekas samodra
awor lan
tetandhingan karo warisan manca
sing padha
dipepundhi lan dipepuja dialembana dening para taruna
temahan warisane
Sang Aji Saka kalindhih tanpa daya
apa ya bakal
pralaya???
17. DILARI
ING KEBLAT PAPAT
Galo kae
sawangen
srengenge
ndhelik karo ngampet guyune
nyekseni
manungsa sing wis kelangan jatidhirine
nunjang palang
tanpa duwe asa wirang
Mlayu ngulon
sajak ana sing akon
rebut dhuncung jare mung arep
ngowahi lelakon
Mlayu ngetan
prasasat ngampet
ambegan
mung saderma
luru pangan
Mlayu ngalor
mbok menawa ing kono isih ana obor
diluru kanggo aweh pepadhang marang
kang asor
Mlayu ngidul
mbok menawa
banjur bisa kumpul
mbok menawa
banjur bisa wadul
tumrap sakabehe
sing wis kebacut ucul
bisaa ngumpul
banjur padha dipikul
Srengenge ndhelik ngampet guyune
nyekseni manungsa sing wis kelangan
keblat
apa iku sing diarani kuwalat?
18. GEGURITAN
WONG CILIK
Wong cilik
linggih dhingklik mangan gogik
wong cilik,
wong cilik
iku...
wong sing pancen
duwe awak cilik
apa wong sing
duwe bandha sethithik?
Sing cetha...
wong cilik iku,
wong sing lagi duwe kodrat ora becik
jalaran
kamardikane dicuthik
panguripane
disirik
wis ngono,
manawa tandange durung pener isih dislenthik
ngalor-ngidul
dikleni kaya jangkrik
Pancen cilaka
donya lagi kebak
angkara
padha seneng
ngumbar duraka
tanpa wedi dosa
Sapa ta??
para manungsa
marang sapa ta??
marang manungsa
kanggo sapa ta??
kanggo manungsa
Banjur wong
cilik??
wis menega!!
sing baku, wong
cilik isih bisa linggih dhingklik mangan gogik
anggep wae gogik
iku sega menthik
sing dilawuhi
iwa kterik
Oh
Gusti....nyuwun pangaksami.
19. GEGURITAN
WENGI
Wengine wis
lingsir
dakcoba ngenam
pikir
apa ta sing
njalari donya walik jungkir?
pranyata anggone
padha kibir
lan anggone duwe
gegayuhan nelukake sembarang kalir
Wengi lumaku
sajak ana sing nggelak
Si Gagak
celathiu karo ngguyu lakak-lakak
jarene para
manungsa wis padha rusak
pranatan akeh
sing diterak
we lha...
Si Emprit sing
tansah diidak-idak
banjur gumlethak
liyane?
padha
surak-surak.
20. DAKELINGAKE
Endi kabisanmu
tuduhna marang
pang-pang sing wis kebacut garing
sing biyen
koksaguhi banyu ing mangsa ketiga
kanggo ngusadani
gurung kang asat
Endi kidungmu
tembangna marang
para biyung ing karang padesan
sing biyen
koksaguhi beras sagegem ing mangsa paceklik
kanggo yidhem tangise anak kang ilang kamardikane
Endi swaramu
sing nate
kokronce dadi pangarep-arep edi
apa wis lali??
dakelingake...
aja ketungkul nelukake
rasa lan panguwasa.
21. CRITANE
SI PRAWAN KENCUR
Wis ora mokal
maneh
prawan kencur
miyar-miyur padha udur
rok mepet eseme
ngujiwat
nyangking tas
jebul isi obat laknat
sing jare bisa
gawe nikmat
para konglomerat
sing morale
bejat
padha pesta
raperduli rakyat uripe kesrakat
Wis ora mokal
maneh
prawan sunthi
mesam-mesem ngregem bathi
rok mini belekan
mburi sajak nantang wani
nyangklong tas
isi pupur lan minyak wangi
megal-megol
marani mobil kang wis ngenteni
digelak diajak
menyang ngendi?
mung dheweke
sing ngerti
Ora nggraita yen
ana sing ngetut wuri
oh...
Si Prawan
ketangkep polisi
bisane mung
nangis nggetuni
ing sepining
wengi
ing antarane
ruji-ruji wesi
bui...
22. PITAKON
Dumuken pranatan
endi kang bakal kanggo panutan
wis ben kabeh
ora kesasar tekan jurang kasengsaran
dumuken, banjur
biwarakna marang para kawula
sing wis padha
kelangan keblat
aja nganti “Esuk
dhele sore tempe”
pranatan mung
dadi pepaesing jaman
katon pideksa
endah lan edi peni
nanging angel
diugemi
jare iki jaman
reformasi
kabeh padha njunjung
demokrasi
malah nganti
direwangi soroh pati
nanging sapa
sing peduli?
marang tangise
bayi sing wetenge njaluk diisi
marang tangise
jejaka sing kapeksa pedhot pasinaone
marang tangise
biyung sing kelangan pangarep-arepe
marang tangise
bapak sing kapeksa nggadhe kamardikane
lan marang
tangis-tangis sing mung diendhem dhewe.
23. CATHETAN
MANGSA KETIGA
Yen wis kaya ngene
iki oh mitra...
banjur arep
nyalahake sapa??
Ketiga dawa
salah mangsa
tetuwuhan garing
ngelak
panguripan
tansaya sesak
Yen wis kaya
ngene iki oh mitra...
ati banjur
nelangsa
ketigane tansaya
dawa
salah mangsa
madina-dina
Gorokan garing
asat
ndremimil
nyenyuwun tanpa kendhat
Yen wis kaya
ngene iki oh mitra...
aku mung sumarah
ngenteni sihing tresna
saka sing Maha
Kuwasa.
24. GURITAN
MRIPAT
Mripat
kanggo ndeleng
kabeh umat
sing mlarat
nganti Si Konglomerat
Sing mlarat lan
kesrakat
nganti ora
kuwawa sambat
jalaran kabotan
sesanggan nganti ora kuwat ngangkat
Si Konglomerat
kang mendem urmat
brana turah
bebasan sundhul awiyat
sing bisa kanggo
nyukupi nganti pirang-pirang brayat
Wah....pancen
nikmat
Waspadakna, mripat
lagi ndeleng
sing mesem ngujiwat
sajak nantang
marang titah aklambi rakyat
Yen nyata
satriya ugemana janji lan amanat
aja mung
thethenguk dupeh caket lan aparat
aja ketungkul
anggonmu bakal nelukake jagad
Waspadakna
ing bau kiwa
tengenmu tansah ana malaikat
kang bakal
nyathet kabeh riwayat
minangka bukti
ing pengadilan akherat.
25. GURIT
TANGAN LAN SIKIL
Tangan
sarana kanggo
ngupaya pangan
ora kendhat
wengi, esuk lan awan
iang sadhengan
papan lan kalodhangan
gegancangan
mundhak ora keduman
ya mung beteke
nyembadani marang wutuhe katresnan
Sikil
mecaki dalan
rumpil
supaya antuk
asil
ora perduli
kuku-kuku padha cuwil
di kantheni
lathi sesambat ndremimil
ya mung beteke
bakal njejegage kendhil.
26. GURITAN
ATI
Ati iku uga
manah
sing bisangrasakake
susah
yen jejering
bapa nganti ora bisa polah
minangkani
kebutuhan bale somah
apa ya mung
bakal pasrah?
ngadhepi
kasunyatan sing tansaya bubrah
Ati iku uga
penggalih
sing bisa ngrasakake
sedhih
yen jejering
panguwasa mung melik pamrih
sing adoh saka
rasa welas asih
ora perduli
kawulane padha nagih
marang
janji-janji nalika durung kapilih
saiki wis dadi
sugih
kawula mung
trima sembulih
arupa sagegem
winih
winih katresnan kanggo
nglelipur brayate supaya lilih
Ati iku ya tetep
ati
tansah
ngedhaleni wetuning uni
kang kudu jumbuh
karo angger-angger yekti
supaya ora ucul
dadi janji
nanging wis
kebacut ketrucut ing dina wingi.
27. PANGURBANAN
Dinane lumaku
tansaya cepet
kaya digelak
nrajang sakehing reribet
Si Jabang Bayi
kijenan ing antarane paesan-paesan donya
ngumbar tangis
ing madyaning katresna maya
Subuh nglilir,
bapa biyung wis ora ana
jarene beteke
mung arep luru brana
kanggo nggayuh
urip mulya
Ngisak, bapa
biyung lagi teka
Si Jabang Bayi
kebacut nglipus ngronce impen sepa
Oh...
dianane lumaku
tansaya banter
kaya digelak
nrajang sakehing wewaler
bapa biyung
bingung njethung nggagas sing wis angler
ing batine
kekejer
apa pangurbanane
wis pener lan bener??
28. PARANG
TRITIS
Nalika gremis
ing gisiking Parang tritis
ana wanita kang
kekejer nangis
tanpa maelu
angin gisik kang nyuntak rasa atis
sajak nggetuni
kasucene kang kebacut kapasrahake kanthi aris
marang priya
kang sejatine mung ngumbar ukara manis
Ombake segara
kidul
apa kuwawa
nyempyok tatu kang wis nabet ing ati
ragane bebasan wis
tanpa aji
kataman curiga
nganti ngendhangake sarining suci
Alon...
srengenge mlaku ngulon
sajak lingsem
nyekseni paiting lelakon
kanigaya temen
jebul peteng dalaning takdir
mulane sakabehe
kekarepan lan pepenginan aja luput ing pikir
Si wanita kanthi
abot jumangkah
ninggalake
lelakon kang wis kebacut bubrah
ing telenge
ati...
mung bisa pasrah..sumarah...mring
Gusti Allah
Nalika gremis
ing gisiking Parang Tritis
wis diselehne
panandhang kang ngebot-eboti sanggan
29. YEN
MANGSANE WIS TEKA
Mung kari
saksrambahan
anggonmu nodhi
kawruhmu
sing wis nate
diwedhar dening para guru
babagan kawruh
lan sekehing ngelmu
Telung taun
ngeceput...
bakal badar ing
wektu sakeplasan
mung gumantung
anggonmu nyuntak, ngrakit lan nata aksara
ora mung
wantahing ukara
nanging sejatine
wedharing rasa kang ngemot sewu makna
Ana sing mesem
kalegan
jalaran
wangsulan-wangsulan sajak wis jumbuh karo pitakon
ana sing getun
nangis sesenggukan
jalaran
wangsulan-wangsulan tetela mrucut saka kekarepan
Ngger...
kahanan iki ora
bisa dibaleni
pandoming wektu
ora bisa diputer mundur
Nggegetun mung
bakal nambah kemba...
30. JANJINE JONGGRANG
Bandhung
Bandhawasa pancen sekti mandraguna
kabukti bisa
nglerehake Prabu Baka
Prambanan
gothang
Jonggrang
kekitrang
tinilar ramane mbebela
negara
Bandhung Bandhawasa
pancen gagah pideksa
sinuyud sinuba
pra wanita jer iku putra Sang Damarmaya
kuwawa ngoncatake
Baka sawadya bala
ora krasa yen
ana sing nandhang dhuhkita
Jonggrang suthik
singidan ngadhepi Bandhung
mungsuh kang
anggung gumunggung
sing wis kasil
nelukake Prambanan
nanging
kepenging uga nelukake katresnane Jonggrang
Bandhung ora
nglegewa
yen katresnane
Jonggrang wis sirna bareng oncate Sang Bapa
candhi sewu ing
wektu sawengi
dudu panyuwun
kang mijil saka tulusing ati
dudu sarana tuwuhing
katresnan jati
nanging mung
kekarepan sinandhi
kang manjing
dadi janji bakal setya bekti mring ibu pertiwi.
31. PANANDHANGE
NAWANG WULAN
Kesengsem
anggone lelumban
kasengsem
anggone gegojegan
nganti ilang kaprayitnane
nalika teka ing
wancine
ora bisa tutwuri
kadang-kadange
O... Nawang
Wulan
kosengguh Jaka
Tarub iku priya utama
kang legawa
paring busana
satemah antuk
kamardikan saka sanggan wirang?
Ora Nawang
Wulan...
iku pokale Jaka
Tarub
sing kepengin nelukake
tresnanmu
sing kepengin
nguwasani jiwa ragamu
kadereng rasa lan
nepsu bakal nyandhing sliramu
Galo...
Si Jaka Tarub
gumuyu
kasil namakake pokal
julige.
32. SAABAD
ING KARANGANYAR
Nalika Nyai Dipa
nglilakake peksi derkuku kelangenane
sejatine wis
cinathet ing lembaraning sejarah
Nalika Raden Mas
Said rumangsa pikantuk pepadhang
sing diajab ya
mung sawijining kamardikan
ing papan kang
ginelar senajan ora pati jembar
sinebut
Karanganyar
kutha cilik ing
perenge wukir Lawu
dituwuhi sedya
kang gunggunge maewu-ewu
kaya ngelingake
marang janji-janji kawuri
kang wis ingucap
nganti dadi prasati
Karanganyar
aja ngglewar
mundhak gegayuhan sekawit cabar
Karanganyar
sengkuda makarya
supaya tetep gumebyar
Yen ana
sandhungan
enggal minggira
senajan tanganmu grewelan
genggemen
pranatan kang wis manjing dadi panutan
Yen ana pasemon-pasemon
kang ketrucut dadi uni
enggal lerena
senajan ukaramu ora bisa nyapih gelaning ati
tulisen minangka
pustaka aji.
33. KARANGANYAR
PING 101
Nalika padha
takon Karanganyar iku apa?
Karanganyar
arupa papan cilik
sing biyen
kanggo madhepok pendhekar wanita Nyai Dipo
lantaran peksi
derkuku kang anggunge dadi sarana
nggayuh bagya
mulya
Raden Mas Said
sakurawangsa
Nalika padha
takon Karanganyar iku sapa?
Karanganyar iku kutha
cilik kang aji
sang tansah
sengkud pepaes dhiri
nggayuh pasuryan
kang edi peni
supaya nengsemake
sinawang dadi mareming ati
Nalika padha
takon Karanganyar iku pira?
Karanganyar ora
mung siji
ana Karanganyar-Karanganyar
liya sing ngrenggani bumi pertiwi
nanging
Karanganyar iki kebak pirang-pirang prasasti
kang nyathet
sejarah sakehing bukti tundhone dadi pepeling aji
Nalika padha
takon Karanganyar iku ngendi?
Karanganyar
madeg ing lerenging Gunung Lawu
nyata endah
dinulu
Karanganyar
madeg ing sawetane Surakarta
nyata merbawani
lan sembada
Nalika padha
takon Karanganyar iku kepriye?
Karanganyar iku
tansah ngugemi janjine
marang pra warga
kang ngatonake kasetyane
nganti 101 taun
tansah ngumandhang kuncarane
34. PIWELING
Nalika wis
ngancik madyaning kadhewasan
tansah goleka
jeneng dhisik supaya enggal antuk jenang
mbudidayaa bisa
nguripi senajan mung urub-urub
ing samubarang
gawe aja rumangsa bisa nanging bisaa rumangsa
yen wis nggebyur
ing madyaning bebrayan
aja mung mokili
nanging dadia pribadi kang mikolehi
udinene tekun
yen kepengin sabarang gegayuhan dadi tekan
aja kesusu sebab
njalari grusa-grusu
aja kebat kliwat
mundhak cedhak karo walat
luwih becik sing
sareh kareben kabeh bisa pikoleh
alon-alon
kareben bisa kelakon
kabeh iku ora
kena nglalekake manembah
lan sumarah
marang Gusti Allah
35. WANCI
SORE ING TLATAH PALU
Dhuh Gustiku
apa iki sing
diarani bebendu?
nistha temen
awakku
ora kuwawa
sambat, amung tumungkul marikelu
muga kalis saka
sakehing reridhu
Bumi malik
gonjang-ganjing
prasasat
nyirnakake pikiran wening
prasasat
nglalekake rasa eling
jiwa raga
mosak-masik kebanting montang-manting
dhuh Gustiku
amung sih welas
paduka muga tansah kula sandhing
Banyu segara
mbleber wutah... uwal saka wadhah
ngukut sakehing
sangkrah tanpa arah
sabarang kalir
karuda peksa kajarah rayah
tan bisa
anglawan anane mung pasrah
Sakehing
reriptan ing sandhuwuring bumi ambles
kaya kakukut tanpa
maelu tapel wates
tanpa nyisa
sakabehe sirna cures
dhuh Gusti...
menapa menika
wohing piwales?
36. PASRAH
Yen wis ketaman
reridhu
amung sumendhe
ing ngarsane Hyang Widhi...
muga enggal
manggih rahayu
Yen wis ketaman
cintraka
amung sumeleh
ing ngarsane kang maha kuwasa
muga enggal
manggih mulya
Yen wis ketaman
bilahi
amung tansah
ngagungake asmane Gusti
muga enggal
pinaringan pangaksami
Yen wis
ketaman...
bakal ngudarasa
nyuntak sanggan
kang mepalangi
dalan
mung marang
Pangeran
37. PANANDHANG
Apa kowe ngerti
ing eseme wong
tuwamu iku ana tangis
rumangsa
prihatin si anak padha kakehan polah
ndedongan lan
wiridan wis padha ora betahapa meneh sumarah manembah mring Gusti Allah
jarene ora
paedah...urip aja digawe susah
Apa kowe krungu
ing guyune wong
tuwamu iku ana pisambat
rumangsa miris
si anak tansah memitran karo maksiyat
ora tanggap
glagat yen donyane meh kiyamat
nguja kekareman
ra perduli raga sekarat
sanajan diweleg
pituduh naging tetep mbejijat
jarene ora
mupangat... urip kudu digawe nikmat
Apa kowe ora
krasa
ing bagya
mulyaning wong tuwamu iku ana panalangsa
rumangsa gela si
anak padha tumindak duraka
padha nyingkur
pituduh lan kawruh utama
dina-dina tansah
kapanjingan suka
datan maelu welas
asihe sudarma
datan mituhu
piwulange dwija
jarene ora
guna... urip kudu digawe suka rena
Gagasen
panandhange wongtuwamu
dina-dina mung
nyandhing memala.
38. CATHETAN
SING MEH KECICR ING ESUK IKI
Nalika keprungu
tangismu kejer
ilang sakabehe geter
akeh sing padha alok
jare bakal dadi bocah pinter
Dinane lumaku sajak
digelak cepet
kabeh dipecaki kanthi
greget
senajan kadhang kala
ana sandhungan reribet
kabeh ditampa kanthi
ati teteg tanpa ana rasa pingget
Ing mangsa-mangsa
tinamtu
manekung khusuk rama
lan ibumu
tanpa kendhat nyenyuwun
tansah sinandhing rahayu
gangsar lancar
sakabehing laku
katekan gegayuhan lan
pepenginan kang diluru
Ing antarane kekarepan
kang digegadhang
dadia damar sing bakal
aweh pepadhang
mbengkas pepeteng lan
panandhang
Terkadhang pepenginan
ora jumbuh karo kanyatan
aja kemba...
tetepa mlaku mecaki
dalaning panguripan
sinartan ati teguh
pikir semeleh lan ulat sumeh
Wilujeng tanggap warsa
ibu
mugya
tetepa rahayu tanpa manggih reridhu.
39. PANANDHANGE DRUPADI
Kok deleh
ana ing ngendi rasa kamanungsanmu, Dursasana?
krungu
tangis kekejer dhadha melar mingkus kebak geter
ngruket
nggondheli ajining makuthane wanita
kowe mung
mesem sajak wis kalegan marem
kokdeleh
ana ngendi rasa welasmu, Dursasana?
nyekseni sang
Drupadi kaglandhang kanthi nyangga wirang
tanpa bisa
nduwa tanpa bisa mbela jiwa raga
kowe mung
ngguyu latah karo bengok-bengok sora
Jarikmu
dudu mung mori wantah, Drupadi
nanging
cathetan sejarah tumrap kawengisane Dursasana
sanajan
kabredhel nanging tetep kekeh
ngayomi
saka takdir nglegena
Ukelan rikmamu
kang kasil wudhar jalaran kajambak lan kalarak
dadi
seksi tumrap kawengisane Dursasana
sing
kepengin ngrudapeksa ajining wanita
mbaka
sawiji bakal namakake piwales marang kang tumindak ina
Dursasana
kudu siyaga mapag pungkasane jantra
lebur
dening laku utama
Mbesuk...
nalika
baratayuda
ing tegal
Kurusetra
kabanjut
dening Sang Bima
40. MAPAG
TAUN ANYAR
Apa isih kurang
cetha
iki wis
dudu sasmita
nanging kasunyatan
kang katon ngegla
bebaya
dumadakan teka tanpa bisa nduwa
bebendu
iki nyata
ing panutupe
Desember taun iki
ngedab-edabi...nggegirisi...
Aja mung
nguja kasenengan
aja mung
nguja kemareman
sumenea
kanggo ngagungake asmane Pangeran
tindakna
kewajiban
manengku
puja ora mung saderma kewajiban
tindakna
kewajiban
mumpung
isih ana kalodhangan
41 BEKTINE
RAMAWIJAYA
MRING SUDARMA
Sapa
sing ora ngerti lelakone Rama
siyaga kawisudha jumeneng nata
nggenteni kalenggahane kang rama
Dasarata
bakal amengku lan angemban praja Ayodya
Sapa sing ora ngerti pakartine Kekeyi
kumawani angendhak angger-angger suci
sing kalah sekti karo wetune janji
kepriyea wae janji kudu diugemi
Angluh sang Dasarata dupi midhanget ature
garwa
tuwuh perang batin kang agawe geter ing jiwa
padha abote sesanggan kang sinangga
sang Dasarta kadhung kalindhih ing ubaya
Bharata pancen awatak satriya
minangka kadang taruna kudu bekti mring kadang
wredha
bakal nyelehake sanggan kraton Ayodya mring
Rama
sing kuwawa mbengkas lan nyirep harda
Ananging Rama uga berbudi lir dewa
tan lila sang sudarma cidra ing upata
Bharata tan kena nyelaki karsa
kanthi piwulang Astha Brata
Bharata sendika ing karya
angrungkebi Ayodya.
42 GURIT KAGEM IBU
Yen aku lagi nangis kekejer
rumangsa kedhodhog atimu nganti krasa geter
terkadhang mung kepingin aweh bebener wae, nganti ora bisa pener
mangka sedyamu aja nganti kabeh keblinger
Yen aku lagi kebranang
rumangsa kasrimpung lakumu tan bisa ngoncati pepalang
terkadhang nganti tuwuh rasa was sumelang
melang-melang aja nganti dadi panandhang
yen aku lagi keduwung
rumangsa kebidhung atimu nganti krasa lewung
terkadhang nganti tuwuh rasa bingung
tansah memuja aja nganti dadi kumprung
Ya kaya ngono mau sawijining ibu
tansah memayu hayuning laku
tansah ambuncang sakehing reridhu
tanpa ngarep-arep paweweh lan pisungsuning sunu
Aja takon apa sebabe
sebab kabeh iku wis manunggal lan runtut nalurine
ibu.......
senajan mengko adoh laku jantraku
isih daksuwun reroncening donga lan pangestu
kanggoku
