Naskah Siaran Bahasa Jawa "Ramayana"

 

NASKAH  SIARAN “KARANGANYAR BELAJAR” RADIO SWIBA KARANGANYAR CERITA RAMAYANA KIDANG KENCANA SELASA, 5 MEI 2020   Mata Pelajara  : Bahasa Jawa Kelas/ Semt.    : VII/ Genap Nama Guru     : Dra. Sulistyowati NIP.                 : 19670408  200701 2 016 Unit Kerja       : SMP Negeri 2 Karanganyar

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

SCRIPT SIARAN PENIDIDIKAN DI RADIO SWIBA KARANGANYAR

 

Assalamualaikum warohmatullohiwabarakatu

Para pamiyarsa/ sutresna radio Swiba ingkang kula urmati/ lan mligine marang anak-anakku/ para siswa SMP/ ing saindhenging laladan Karanganyar lan sakiwa tengene sing taktresnani//

Wilujeng enjing/ ketemu maneh karo ibu Sulistyowati / ing acara  KARANGANYAR BELAJAR/ kaya padatan/ acara iki digiyarake dening Radio Swiba FM/ Radionya Karanganyar/

 

Ing wektu iki mengko/ suwene kurang luwih 30 menit/ Bu Sulis bakal ngajak bebarengan para siswa /nyinau piwulang  utawa MATA PELAJARAN Basa Jawa/ kanthi wosing pasinaon yaiku   Crita wayang Ramayana perangan Kidang Kencana.

Sadurunge  kawiwitan/ Ayo...// Anak-anakku siswa kabeh/ luwih dhisik padha ndedonga bebarengan/ nyenyuwun marang Gusti Kang Maha Kuwasa/ muga tansah pinaringan bagas waras/ tansah rahayu  lan tansah bagya mulya//  Panyuwunan kang mligi/ konjuk marang  ngarsane Gusti Kang Maha Asih/ muga-muga/ kahanan Indonesia/ kang lagi nadhang musibah/ kanthi anane lelara kang disebabake dening VIRUS COVID 19/ enggala bisa bali dadi ayem tentrem maneh//. AAMIIN

O....ya/ kaya padatan/ aja lali/ para siswa nyawisake buku lan piranti kanggo nulis/ mbok menawa/ ana perangan-perangan wigati / kang bakal koktulis/ kanggo nambah kawruhmu//

 

Para siswa/ sadurunge mirengake andharan babagan Crita wayang Ramayana Kidang Kencana / bu Sulis arep paring pitakon  marang para siswaku sing pinter-pinter//... Mesthine/ para siswa/ wis padha tau  krungu lan nonton pentas wayang.//  nggih .... ana sing ngrungokake giyaran wayang lumantar radio // ana sing nonton pentas wayang ing televisi/ malah/ mbok menawa ana sing nonton  pentas wayang  kanthi  langsung//

Pitakone : Sapa paraga wayang sing koksenengi lan apa sebabe kowe seneng marang paraga kasebut??  Para siswa sing daktresnani/  kowe kabeh / mengko bisa atur wangsulan/ kanthi ngirim wangsulan kasebut ing Radio Swiba Radionya Karanganyar // yaiku  lumantar aplikasi WA kanthi  nomer   089 692 161 405//

 

Para siswa... ing ngarep mau wis diandharake// manawa bu Sulis arep paring piwulang / kanthi wosing pasinaon yaiku/ Crita wayang Ramayana   Kidang Kencana// Kanggo mangerteni andharan kang luwih komplit/  mulane/ para siswa bakal dakajak /sinau bebarengan babagan kasebut ing antarane yaiku:

A. Paraga ing Crita wayang Ramayana   Kidang Kencana

B. Ringkesane crita wayang Ramayana   Kidang Kencana

C. Wosing budi pekerti utawa nilai karakter sing bisa kajupuk saka  Crita wayang Ramayana

     Kidang Kencana.

 

Ayo digatekne/ saiki Bu sulis arep wiwiti/ paring andharan   babagan kasebut/

Perangan  A :  

Para paraga ing Crita wayang Ramayana   Kidang Kencana:

1.      Raden Ramawijaya                 : Raden Ramawijaya iku putrane Prabu Dasarata/ kang dadi raja ing kraton ayodya/ karo ibu Dewi Raghu utawa Dewi Kosalya.

2.      Dewi Sinta                              : Dewi Sinta garwane Raden Ramawijaya

3.      Raden Laksmana                     : Raden Laksmana iku adhine Raden Ramawijaya . dadi uga putrane Prabu Dasarata nanging saka ibu Dewi Sumitra

4.      Prabu Rahwana utawa Dasamuka       : Prabu Rahwana utawa Dasamuka iku/ raja  kang awujud raseksa utawa buta/ kang ngratoni nagara Alengka//

5.      Kala Marica                             : Kala Marica iku uga raseksa utawa buta/ abdine Prabu Rahwana kang memba-memba/ salin wujud dadi Kidang Kencana.

Kuwi mau/ para paraga ing Crita wayang Ramayana  Kidang Kencana //

 

Bacute Perangan B: /

Perangan B yaiku reringkesane Crita wayang Ramayana  Kidang Kencana//

Crita wayang Ramayana  Kidang Kencana iku kawiwitan/ nalika Raden Ramawijaya  nindakake darma/ kudu ninggalake kraton Ayodya/ lan manggon ing satengahe alas Dhandhaka//

Para siswa isih kelingan ta....???/ apa sebabe / Raden Ramawijaya  ninggaleke kraton Ayodya / lan banjur manggon/ ing satengahe alas Dhandhaka.....?? Nggih... jalaran/ Raden Ramawijaya/ mung kepengin atur bekti/ marang keng ramane/ yaiku prabu Dasarata//

 

Prabu Dasarata/ kagungan putra cacah  4/ yaiku Raden Ramawijaya saka ibu Dewi Raghu utawa Dewi Kosalya/ Raden Lesmana lan Raden Satrugna/ saka ibu Dewi Sumitra/ sarta Raden Barata/ saka ibu Dewi Kekeyi. //

Nalika semana/ Prabu Dasarata  wis yuswa sepuh/  kepingin masrahake kraton Ayodya/ marang putra kakung sing lair dhisik dhewe/ saka ibu prameswari/ lan sing kudune/ nduweni hak dadi raja/ yaiku Raden Ramawijaya// Ananging/ nalika Raden Ramawijaya arep dijumenengake dadi raja/ Dewi Kekeyi ora trima//  Dewi Kekeyi nagih janji marang Prabu Dasarata / Jalaran/ pancen Prabu Dasarata nate kagungan janji/ marang Dewi Kekeyi// janjine yaiku/ Dewi Kekeyi dikeparengake nduwe panyuwunan cacah 2... lan apa wae panyuwunane/ bakal dikeparengake......Dewi Kekeyi/ ora enggal ngaturake panyuwunan cacah 2 kasebut.... nganti/ nalika Raden Ramawijaya bakal dijumenengake raja/ lagi ngaturake panyuwunane.

Ewadene panyuwunane Dewi Kekeyi yaiku:

1.      Nyuwun marang Prabu Dasarata/ supaya sing dadi raja ing Ayodya iku putrane/ sing asmane Barata

2.      Raden Ramawijaya kudu ninggalake kraton Ayodya  suwene 14 warsa utawa 14 taun.

 

Nah...gek kepriye iki????/ tumrap Raden Ramawijaya/ sing sejatine bakal ngganti dadi raja ing Ayodya/ nalika mireng panyuwune Dewi Kekeyi???... duka?...ora/ gela?...ora....//Raden Ramawijaya/ tetep sabar lan ikhlas nampa sakabehe.....

Ya amarga rasa bektine marang keng ramane/ lan supaya keng ramane/ ora cidra ing janji/ mulane Raden Ramawijaya/  kanthi rasa lila legawa/ minangkani pamundhute ibu kwalone/ yaiku Dewi Kekeyi// Banjur Raden Ramawijaya ninggaleke kraton Ayodya/ kanthi didherekake garwane/ yaiku Dewi Sinta/ lan adhine/ yaiku Raden Laksmana// Katelune banjur manggon ing satengahe alas Dhandhaka.

Bacuting crita / Tetelune / yaiku Raden Ramawijaya, Dewi Sinta, lan Lesmana/ banjur manggon ing satengahe alas Dhandhaka/ kanthi nggawe wangunan omah prasaja/ kang kabeh bebakalane wangunan/ ya mung kajupuk saka alasa kono/ jalaran pancen Raden Ramawijaya/ Raden Laksmana lan Dewi Sinta/ nalika ninggalake kraton Ayodya/.... ora nggawa apa-apa//

 

Nah.....ing sawijining dina/ pinuju  Raden Ramawijaya, Dewi Sinta, lan Lesmana/ lagi padha jejagongan/ ana sawijining kewan kidang/ kang mara nyaketi//  Kidang kasebut mujudake salah sawijining kewan alas/ nanging beda karo kidang-kidang liyane// ulese kulite mrusuh/ kuning nemu giring/ malah bisa diarani/ kuning kaya emas//  polahe trengginas/ kaya nduwe prabawa kang gedhe// Kidang kasebut arane kidang kencana//

 

Kidang mlayu mrana-mrene/ mlumpat-mlumpat/ sajak nggodha ati // Priksa ana kidang/ kang beda karo kidang-kidang liyane/ Dewi Sinta kesengsem// kepencut// pingin kagungan kidang kang endah iku// Mula kanthi ngati-ati / Dewi Sinta ngrekadaya/ nyekel kidang kasebut// Nalika ngerti manawa arep dicekel/ si kidang tansaya mlumpat/ mlayu mrana mrene sajak ngece// Gandheng Dewi Sinta kangelan/ anggone arep nyekel kidang/ mula banjur ngaturi Raden Ramawijaya/ supaya nyekelake kidang// Amarga rasa tresnane marang garwa/ Raden Ramawijaya/ saguh nyekelake kidang/ kang wis mlayu anggendring ninggalake papan kono//

 

Sadurunge tindak  ngoyak  kidang / Raden Ramawijaya pamit marang garwane/ lan paring weling marang Raden Laksamana/ supaya ngreksa utawa njaga/ keslametane Dewi Sinta// Raden Laksmana uga diweling/ ora kena ninggalake Dewi Sinta/ manawa Raden Ramawijaya durung kondur ing papan panggonane // Raden Laksmana matur sendika//

 

Raden Ramawijaya/ enggal-enggal nututi/ lan nggoleki kidang kencana kang mlayu// teruuuus ditutake/ nganti tekan tengah alas gung liwang-liwung// Kanthi ngati-ati/  Raden Ramawijaya ndingkik saka mburine kidang// Kidang sajak ngerti/ manawa ana sing ndingkik/ mula banjur mlayu ngendhani// Raden Ramawijaya/ rumangsa diece dening si kidang// mula banjur nglepasake jemparing (panah)/ kaenenrake prenahe kidang// Kidang kencana kena panahe Raden Ramawijaya/ Kidang kencana ambruk/ jemparing nembus awake kidang//

 

Nanging ana kedadean kang aneh/  kidang kencana kang nandhang tatu/ jalaran kena jemparing mau muksa//...  bebarengan karo muksane kidang/ gumanti karo  metune raseksa/ abdine Prabu Rahwana/ yaiku/ Kala Marica//.... tetela ya Kala Marica iku/ kang memba-memba dadi kidang kencana// dene acas tujuane/ kanggo misahake/ antarae Raden Ramawijaya lan Dewi Sinta// Raden Rama duka/ rumangsa dipaeka/ utawa diapusi/ dening kidang kencana Kalamarica// mula Kala Marica banjur kaperjaya / utawa dipateni dening Raden Ramawijaya// Mbarengi karo patine Kala Marica/ Kala Marica mbengok seruuuu banget/  kanthi ngemperi swarane Raden Ramawijaya// Pambengoke Kalamarica/ kaprungu nganti tekan papan dununge Dewi Sinta//

 

Dewi Sinta/ midhanget swara pambengok sing memper swarane Rama// Dewi Sinta ngira/ iku swara pambengoke Raden Ramawijaya temenan// Tuwuh rasa kuwatir marang keslametane Raden Ramawijaya/ mula banjur dhawuh marang Raden Laksamana/  supaya enggal nusul Raden Ramawijaya// Raden Leksmana ora kersa nusul/ jalaran mau wis diweling karo Raden Ramawijaya/ ora kena ninggalake Dewi Sinta / manawa Raden Ramawijaya durung kondur/  saka anggone ngoyak kidang.

Mireng ature Raden Laksmana/ sing ora kersa nusul Raden Ramawijaya/ Dewi Sinta sajak duka// banjur ngundhamana/ lan ndakwa menawa Raden Laksmana/ kepengin ngajap/ sedane Raden Ramawijaya/ jalaran Raden Laksmana kagungan rasa tresna/ marang Dewi Sinta//

 

Mireng pangandikane Dewi Sinta/ Raden Laksmana cuwa penggalihe/ dene Dewi Sinta/ kagungan pandakwa kang kaya mangkono//  Banjur Raden Laksmana/ saguh nututi lan nggoleki/ Raden Ramawijaya// Sadurunge ninggalake Dewi Sinta/ Dewi Sinta kapapanake ana ing panggonan / kang wis diwenehi rajah/ kanthi piweling/ supaya Dewi Sinta/ ora kena ninggalake papan kang wis karajah mau/ manawa Dewi Sinta/ metu saka panggonan kang wis dirajah/ bakal nemahi bebaya// sewalike / wong liya kang nduwe niyat ala/ uga bakal nemahi bebaya/ samangsa mlebu menyang panggonan kang karajah kasebut//

 

Raden Laksmana banjur ninggalake Dewi Sinta/ nanging sepisan maneh/ Raden Laksmana atur weling marang  Dewi Sinta/ supaya ora  ninggalake papan sing wis karajah/ Sarta matur/ manawa pandakwane Dewi Sinta iku ora bener// Raden Laksmana ora nduwe niyat nresnani Dewi Sinta/  kanggo ngyakinake Dewi Sinta/ manawa Raden Laksmana ora kagungan niyat tresna/ mula Raden Laksmana prasapa utawa sumpa// Prasapane yaiku/ Raden Laksmana bakal nglakoni wadat/ sing tegese/ ora bakal kagungan garwa salawase urip.

 

Raden Laksmana/ kasil ketemu karo Raden Ramawijaya/ banjur didangu/ kenengapa ninggalake Dewi Sinta// Raden Laksmana matur apa anane// Raden Ramawijaya/ bisa nampa ature Raden Laksmana/ lan Raden Ramawijaya uga maringi ngerti/ manawa sejatine kidang kencana iku/ malihane Kala Marica/ abdi kinasihe Prabu Rahwana //

Kalorone/ banjur padha bali ninggalake papan kasebut/ kondur tumuju papane Dewi Sinta.

 

Ing Papane Dewi Sinta/  Dewi Sinta sajak ora nglegewa (nggagas)/ manawa ana sing nggatekake/ yaiku Raja Alengka Prabu Rahwana/ kang niyate/ kepengin nggarwa Dewi Sinta// Prabu Rahwana/ nyedhaki papane Dewi Sinta niyate arep ndhustha / nyolong Dewi Sinta//  nanging ora bisa/ jalaran Rahwana ora bisa mlebu papane dewi Sinta/ sing wis karajah dening Raden Laksmana// Prabu Rahwana ninggalake Dewi Sinta/ banjur malih dadi wong tuwa njejaluk/ kang kahanane memelas banget// Wong tuwa kasebut/ banjur nyedhaki papane Dewi sinta/... matur nyuwun diparingi sedekah// Dewi sinta dhawuh/ supaya wong tuwa njejeluk kuwi mara nyedhak//  nanging wong tuwa kasebut matur ora bisa/ awake lemes lan lara// Mireng ature wong tuwa njejaluk kasebut//... banjur tuwuh rasa welas asihe Dewi Sinta/ nganti lali piwelinge Raden Laksmana / supaya ora metu saka papan kang dirajah//  Dewi Sinta / metu saka papan kang dirajah/ niyate bakal maringi pangan/ marang wong tuwa kang njejaluk// Nanging durung nganti pangan diulungake / wong tuwa njejaluk iku banjur nyaut astane Dewi Sinta/... Dewi Sinta kaglandhang .... digawa mabur // Lan tetela wong tuwa njejaluk iku   malih rupa dadi Raja Ngalengka Prabu Rahwana utawa Dasamuka.

Nah...anak-anakku...iku mau ringkesane crita Ramayana Kidang Kencana//

 

 

 

Prangan C

Wondene perangan C yaiku/ Wosing budi pekerti/ utawa nilai karakter/ sing bisa kajupuk saka  Crita wayang Ramayana Kidang Kencana// Ing crita kasebutakeh tinemu/ nilai-nilai karakter/ utawa wosing budi pekerti/ sing bisa kojupuk/ lan bisa kokanggo/ dadi gegondhelan ana ing uripmu// antarane:

1.      Raden Ramawijaya kanthi  lila legawa ninggalake kraton Ayodya jalaran keng ramane wis kadhung duwe janji marang Dewi Kekeyi.

= Anak kudu tansah bekti lan mituhu marang dhawuh pangandikane wong tuwa

2.      Dewi Sinta tetep ndherek Raden Ramawijaya ninggalake kraton Ayodya sanajan kudu urip prasaja ing satengahe alas Dhandhaka.

= Kudu tansah setya tuhu ngampingi garwa ing kahanan apa wae

3.       Raden Laksmana tetep ndherek Raden Ramawijaya ninggalake kraton Ayodya sanajan kudu urip prasaja ing satengahe alas Dhandhaka

= Kudu tansah asih tresna marang sedulure, tansah tetulung lan tansah ngayomi.

4.      Dewi Sinta priksa kidang banjur kepengin nyekel lan nduweni

= Ora kena gampang kengguh marang barang sing dudu duweke

5.      Raden Ramawijaya saguh lan kersa nyekelake kidang kanggo Desi Sinta

= tansah nyembadani lan mbyantu marang garwa samangsa garwa kagungan panyuwunan

6.      Raden Laksmana ora kersa nusul Raden Ramawijaya sing ngoyak kidang, jalaran wis diweling manawa kudu njaga Dewi Sinta

= Tansah nyekel amanah sing wis ditampa

7.      Dewi Sinta ndakwa marang Raden Laksmana manawa nduwe rasa tresna.

= Ora kena nibakake pandakwa manawa durung ana buktine dadi kudu ngati-ati omongan

8.      Dewi Sinta maringi pangan marang wong tuwa njejaluk

= Tansah nduwe rasa welas asih lan seneg tetulung  marang wong kang mbutuhake

9.      Prabu Rahwana ndhustha utawa nyolong Dewi Sinta sing wis nyata-nyata kagungan garwa.

= Ora kena nduwe tumindak angkara, srakah lan ngrusak angger-anggere bebrayan utawa aturan masyarakat

10.  Kala Marica gelem ngapusi uatawa maeka marang Raden Ramawijaya kanthi malih rupa dadi kidang kencana.

= Tetulung kuwi kudu kanggo kabecikan

 

 

Para siswa... iki mau andharan ngenani Crita wayang Ramayana  Kidang Kencana //

Crita kasebut/  isine ngandharake/ manawa Prabu Rahwana anggone kepingin nggarwa Dewi/ Sinta kanthi maneka cara kang julik/ antarane// kanthi ndhawuhi abdine/ kang aran Kala Marica/ supaya malih dadi kidang kencana /perlune supaya misahake Dewi Sinta lan Raden Ramawijaya//.

 

Anak-anakku para siswa sing taktresnani/ sadurunge takpungkasi// bu Sulis arep mriksani apa ana sing wis kirim wangsulan saka pitakon kang takparingake ing ngarep mau....

......................................................................................................................................

Para siswa... jane isih akeh/ wangsulan-wangsulan sing wis kokkirim// ananging/ amarga winates wektune // mula ya kudu dipungkas//

 

Kanggo mbuktekake/ yen para siswa mau/ tansah mirengake andharan kanthi temenan// Iiki bakal takparingi pitakon // Wangsulan saka pitakon  iki  mengko/ supaya ditulis ing bukumu / manawa wis rampung/ banjur diaturake/ marang bapak utawa ibu guru Basa Jawa/ ing sekolahmu dhewe-dhewe// mesthine lumantar WA utawa aplikasi liyane// Jalaran ing wektu iki/ kowe kabeh durung dikeparengake lelungan/ kanthi ninggalake omah//

Pitakone yaiku:

1. Sapa wae paraga sing bisa kokconto ing crita Ramayana Kidang Kencana, Apa sebabe?

2. Nilai karakter utawa wosing budi pekerti apa sing bisa kokjupuk saka crita Ramayana Kidang   

    Kencana??

Lan marang anak-anakku/ sing isih kepengin gladhen// lan nggarap soal ing crita Ramayana Kidang Kencana/ bisa mbuka link kanthi alamat https://bit.ly/2SruNrE

 

Nah/ Para siswa SMP saindhenging laladan Karanganyar/ lan sakiwa tengene sing daktresnani//

Iki mau/ andharan saka bu Sulis/ ing acara Karanganyar Belajar/ kang kagiyarkae dening Radio Swaba Radionya Karanganyar// Muga-muga ana gunane lan bisa nambah kawruhmu // ing wasana/ Tetep waspada/  khusuk ndedonga lan sengkud makarya/ matur nuwun,/ wilujeng enjing/ Wassalamualaikum warohmatullohiwabarakatuh/

                                                                                   

                                                                                    Karanganyar, 5 Mei 2020

            Mengetahui                                                      

            Kepala SMP N 2 Karanganyar                                   Guru Bahasa Jawa

 

            Sumarni, S.Pd., M.Pd.                                                Dra. Sulistyowati

            NIP. 19601006 198112 2 003                                     NIP. 19670408 200701 2 016

TULADHA TEKS PACELATHON

          Materi Pembelajaran

Nyuwun Warah Bapak Haris

Bagas              : “Kula nuwun”.

Ridwan           : ”Mangga. O, kowe ta Gas. Kok njanur gunung gelem dolan                                                   mrene.Ayo mlebu lan lungguh dhisik kene”.

Bagas              : “Ya, matur nuwun Wan, iki mau bubar sholad Isya ing masjid  terus                             mampir mrene, arep sowan lan ketemu Pak Haris. Ana ta ?”

Ridwan           : “Ana. Sajake kok wigati banget arep ana perlu apa ta?”

Bagas              : “Kepengin nyuwun priksa babagan cangkriman.”

Ridwan           : “Cangkriman kuwi rak bedhekan ta. Gek cangkriman apa   Gas”

Bagas              : “Bapak pucung renteng-renteng kaya kalung/ dawa kaya  ula/ pencokanmu                           wesi miring/ sing disaba si pocung mung turut kutha. ”

Ridwan           : “Wah.... gek apa ya batangane. Lha kok angel temen.                                                 Rumangsaku aku bisa. Yen mung pitik walik saba meja wae aku ngerti                                                   yaiku sulak. Nanging yen kuwi aku ora ngerti. Yen ngono tak ngaturi                                                        bapak wae ya?”

Pak Haris         : “O, ana Nak Bagas ta.”

Bagas              : “Inggih Pak, kula sowan. Nyuwun pangapunten dalu-dalu.”

Pak Haris         : “Ora dadi apa. Iki ngepasi longgar.Ana apa kok kadingaren mrene?”

Bagas              : “Menika Pak. Badhe nyuwun priksa.”

Pak Haris         : “Nyuwun priksa bab apa?”

Bagas              : ” Bab cangkriman. Menika wonten tugas saking sekolah babagan cangkriman.”

Pak Haris         : “O... Ngono ta, la sing dikarepane cangkriman apa?”

Bagas              : “Menika lho Pak. Cangkriman ingkang ungelipun: Bapak pucung renteng- renteng kaya                             kalung/ dawa kaya ula/ pencokanmu wesi miring/ sing disaba si pocung mung turut                                 kutha?”

Pak Haris         : “Yen cangkriman kuwi tegese sepur.”

Bagas              : “O...sepur ta Pak... Cangkriman menika menapa kemawon?”

Pak Haris         : “Iya, La Cangkriman iku kaperang ana papat. Nomer siji cangkriman wancahan.                                         Cangkriman sarana mancah/ nyekak tembung-tembunge. tuladhane Wiwa wit                                         lesmbadhonge sing batangane wi dawa wite, tales amba godhonge. ”

Bagas              : “Tuladha sanes lut maendhut yu maerong, welut omahe ngendhut, yuyu                                omahe ngerong.”

Pak Haris         :“Ya....ya bener. Terus ana cangkriman irib-iriban/ pepindhan. Cangkriman                 iki batangane meh padha karo kahanan bedhekane. Tuladhane Pitik walik                             saba meja.”

Bagas              : “Batanganipun sulak?”

Pak Haris         : “Bener. Bacute cangkriman blenderan. Cangkriman iki ancase mung                                     kanggo mlesedke karep. Tuladha Aja tuku dhawet ideran lho,sing nyaring                   santen nganggo kathok. Manawa sing diwenehi cangkriman ora mudheng                    karepe mesthi ora bakal tuku dhawet ideran tenan amarga panampane                                         sing nyaring nganggo kathok. Kamangka sing dikarepake iku sin nyaring,                           ateges wonge. La ya mesthi sing nyaring nganggo kathok...yen ora                              nganggo kathok la   apa wuda....”

Bagas              : “O... Inggih Pak. Lajeng sanesipun menapa?”

Pak Haris         : “Sing pungkasan tuladhane kaya cangkrimanmu kuwi. Cangkriman iku                                  awujud tembang, mula diarani cangkriman sinawung ing tembang.”

Bagas              : “Wo alaaah... dados mekaten nggih Pak. Cangkriman menika werni-                                     werni.”                                   

Pak Haris         : “Iyaa....Piye? wis paham apa durung?”

Bagas              : “Inggih, sampun Pak, sampun mangertos. Matur nuwun sanget Bapak                                  kersa paring piwucal. Samenika kula bandhe  nyuwun pamit. Sepisan                                  malih matur nuwun.”

Geguritan

 WONG MLARAT

           Wong mlarat kesrakat

            iya wae

            wong sugih ya kesrakat

            ora wae

            iya wae

            sing kesrakat budine

            sing kesrakat welas asihe

            sing kesrakat jiwane

            sing kesrakat kamanungsane

            Kesrakat

            wong sugih padha adu rosa

            rebut panguwasa numpuk bandha

            wong mlarat padha adu rasa

            rebut pangimpen numpuk pangentha-entha

            iya wae

            datan kendhat 

            nganti sekarat

PENGET 1
Dina wingi wus lungse

sabarang gawe

daksigeg daktali lawe

datan dakrungu

panjerite ati wanodyayu

ngumbar panantang

ngesok panandhang

nganti kedharang-dharang

marang ati lanang

sing wis tinggal glanggang

medhot kapang

Iki dina, gagat raina

srengenge kang prapta nggawa crita papa cintraka ing wingi dina

gumanti sih tresna kang nyajiwa

nyawiji mecaki garising wadi

wewadining Gusti kang wis kinodrat kudu diugemi

Gagat raina, dudu panalangsa

nalika, jenthik manis wus rinengga kalpika

nalika, kekarone angregem asta

nalika, kekarone angucap setya

dumeling swara-swara donga

njalari sirna sakabehing pangudarasa

Iki dina, dadiya penget utama

“Sihing priya nedya manunggal ing jiwa”

nyawiji, bakal kekanthen lumaku ing bebrayan suci

kan linambaran bekti sejati                                                  

TEMBANG ASMARANDANA

MANGUN BEBRAYAN ANYAR

1.     Asmara wus nunggal kapti

        trus arsa mangun bebrayan

        nuhoni patrap darmane

        becik ngesti tri prakara

        paugeran kang rinancang

        dahat kedah amituhu

        karya sarananing gesang

2.     Paugeran imgkang dhihin

        tansah manembah Pangeran

        kang dwi ngaturken sungkeme

        mring kang ibu tuwin rama

        kinarya lantaran kita

        wuntat samya asih asuh

        mring garwa tuwin sasama

                                                          Anggara Kasih, 26 Januari 1993

TATA CARA UPACARA PENGETAN AMBAL WARSA

TATA CARA UPACARA  PENGETAN AMBAL WARSA KABUPATEN KARANGANYAR INGKANG KAPING 100, DINTEN SETU PAING SURYA KAPING 18 WULAN NOPEMBR WARSA 2017 KAPURWAKAN

1.             Para manggalaning  bregada nyiagakaken  bregadanipun piyambak-piyambak

2.             Manggalaning upacara samekta ing papan upacara

3.             Pakurmatan dhumateng manggalaning upacara dipunpandhegani dening manggalaning  bregada ing kanan piyambak

4.             Palapuran para manggalaning  bregada dhumateng manggalaning upacara

5.             Sesepuh upacara rawuh ing sasana upacara,  bregada kasiyagakaken

6.             Atur pakurmatan dhumateng sesepuh upacara kapimpin manggalaning upacara

7.             Atur palapuran manggalaning upacara dhumateng sesepuh upacara

Pangereking Bendera Merah Putih kalajengaken pakurmatan dhumateng Bendera Merah Putih kapimpin dening manggalaning upacara kairingi kumandhanging  lagu Kebangsaan Indonesia Raya

8.             Ngeningaken cipta kapimpin dening sesepuh upacara

9.             Pamaosing teks Pancasila dening sesepuh upacara katirokaken dening sedaya pandherek upacara

10.         Pamaosing Pembukaan Undang-Undang Dasar Negara Republik Indonesia tahun 1945

11.         Tanggap wacana dening  sesepuh upacara

12.         Ngumandhangaken sesarengan  lagu wajib nasional :

a.            Tanah Air

13.         Pamaosing donga

14.         Atur palapuran manggalaning upacara dhumateng sesepuh upacara bilih upacara sampun purna

15.         Atur pakurmatan dhumateng sesepuh upacara kapimpin dening manggalaning upacara

16.         Sesepuh upacara kepareng jengkar saking sasana upacara.

17.         Atur pakurmatan dhumateng manggalaning upacara kapimpin manggalaning barisan ing kanan piyambak

18.          Manggalaning upacara kepareng nilaraken papan upacara tumuju papan sakawit

Upacara purna, manggalaning barisan ambibaraken  pandherek upacara.

TULADHA SESORAH BASA JAWA

PIDHATO

NGURI-URI KABUDAYAN JAWI INGKANG ADI LUHUNG

Assalamu’alaikum, Wr.Wb.

Bapak, Ibu ingkang kinabekten.

Para tamu sinedhahan ingkang kinurmatan

Sumangga kula lan panjenengan tansah ngaturaken raos syukur, mugi konjuk dhumateng Gusti ingkang Maha Kuwaos, awit ing titi wanci menika kula lan panjenengan taksih pinaringan  rahmat lan hidayahipun.

Satemah saged makempal wonten ing papan ngriki kanthi suka bagya nir ing sambekala.

Bapak, ibu lan tamu sinedhahan ingkang  tansah bagya mulya.

Ing ngriki keparenga kula badhe matur babagan kabudayan jawi ingkang nyata adi luhung, inggih menika kados pundi caranipun nguri-uri kabudayan ingkang adi luhung menika supados tansah lestari ing bumi Indonesia mliginipun ing  tanah Jawi.

Kabudayan Jawi menika kawentar budaya ingkang alus lan anggadhahi piwucal-piwucal luhur.

ingkang  saged dipunangge sedaya tiyang ing salebetipun  lelumban ing madyaning bebrayan agung.

Saged dipunangge mbetengi tiyang saking tumindak lan pakarti ingkang nistha.

Ananging, samenika kabudayan ingkang nyata adi luhung kala wau kados-kados radi ical saking bebrayan agung ing tanah Jawi,  

amargi sampun kaesuk dening budaya manca ingkang dereng mesthi jumbuh  kaliyan kapribaden tiyang Jawi.

Malah,  saperangan  wonten ingkang nganggep bilih kabudayan Jawi sampun mboten trep kaliyan kawontenan jaman.

Awit saking menika wigatos sanget anggadhahi cara kangge nguri-uri kabudayan jawi supados saged tetep lestari ing bumi pertiwi, inggih menika;

1.     Tiyang Jawi kedah anggadhahi raos remen lan mongkog dhumateng       budaya jawi

2.     Tiyang Jawi mboten lingsem menawi tansah ngginakaken budaya   Jawi

3.     Tiyang Jawi tansah purun milah lan milih budaya manca ingkang    nyata-nyata jumbuh kaliyan kapribaden Jawi kemawon. Ingkang      mboten jumbuh mugi mboten dipunangge.

Bapak, ibu lan tamu sinedhahan ingkang  tansah bagya mulya.

Saking andharan kula kala wau saged kapendhet dudutanipun inggih menika:

Tiyang Jawi kedah remen lan mongkog anggadhahi kabudyan jawi.

sarta saged milah lan milih dhumateng budaya manca ingkang mlebet dhateng bumi pertiwi.

Kanthi pangajab mugi kabudyan jawi tetep lestari nyawiji ing bumi pertiwi ingkang kita tresnani.

Ing wasana cekap  semanten atur kula.

Kutha Karanganyar kawentar kutha Intan pari. Mugiya tansah sabar, menawi wonten atur ingkang mboten mranani nyuwun agunging pangaksami.

Nuwun, Matur nuwun

Wassalamualaikum wr wb

NASKAH PIDATO TINGKAT SMP

NGURI-URI BASA JAWI MINANGKA SEMPALANING KABUDAYAN JAWI

Assalamualaikum, wr. wb

Dewan juri ingkang kinurmatan

Bapak ibu ingkang kinabekten

Kanca-kanca ingkang kula tresnani

Hamurwakani atur, sumangga, kula lan panjenengan tansah ngaturaken puji syukur Alhamdulillah wonten ing ngarsanipun Gusti Allah SWT, awit ing wekdal menika sampun paring kanugrahan, rahmat saha hidayah, satemah ing titi wanci menika kula lan panjenengan saged makempal manunggal wonten ing papan ngriki kanthi rahayu tanpa reridhu.

Dewan juri lan para tamu ingkang winantu ing karahayon.

Ing wekdal menika, kula badhe ngaturaken andharan babagan : NGURI-URI BASA JAWI MINANGKA SEMPALANING KABUDAYAN JAWI

Sampun dipunmangertosi, bilih basa Jawi menika mujudaken salah satunggaling basa daerah ingkang wonten ing negari Indonesia. Pramila, sumangga, kula lan panjenengan tansah mbudidaya supados basa Jawi menika mboten sirna awit  kagerus dening kemajengan jaman.

Basa Jawi saged kalebetaken wonten ing kabudayan Jawi, ingkang sejajar kaliyan beksan Jawi, gamelan, tembang macapat, geguritan lan sanes-sanesipun.

Ingkang baken, kados pundi pambudidaya kula lan panjenengan anggenipun badhe njagi lan nguri-uri basa Jawi menika.

Mboten klentu, menawi kula lan panjenengan purun nyinau saha purun ngginanaken basa Jawi kanthi laras lan leres.

Dewan juri lan para tamu ingkang kula kurmati

Ing wekdal menika, tasih kathah para siswa ing sekolah, ingkang mboten remen ngginakaken basa Jawi. menawi purun, tasih kathah ingkang karaos mboten jumbuh kaliyan unggah-ungguh.

Pramila, kanthi wontenipun andon trampil pidhato basa Jawi menika kula ngajak, mliginipun dhumateng kanca-kanca para siswa, supados:

1.       Para siswa kedah anggadhahi raos remen lan mongkog dhumateng basa Jawi

2.       Para siswa  mboten lingsem, menawi tansah ngginakaken basa Jawi

3.       Para siswa kedah saged milah lan milih dhumateng basa ingkang jumbuh kaliyan unggah-ungguh.

Kanthi andharan kula menika saged kapendhet dudutanipun, inggih menika:

Para siswa gadhah tanggel jawab dhumateng lestarining basa Jawi .

Satemah anggadhahi tekad saiyeg saeka kapti, nguru-uri basa Jawi .

Ing pangajab, basa Jawi saged tetep lestari, nyawiji ing pribadi saha ngrembaka ing bumi pertiwi.

Andharan kula kasebat trep kaliyan sekar macapat gambuh ingkang  badhe kula sekaraken;                Para Kadang sedulur

                             ngrengkuh budaya kang adi luhung

                             kabudayan Jawi ingkang wus nyawiji

                             dadi suh pandoming laku

                             urip bisa tatag tanggon

Ing wasana sekap semanten atur kula.

Kutha Karanganyar, kawentar kutha Intanpari

Mugya tansah sabar, menawi atur kirang mranani, nyuwun agunging pangaksami,

Nuwun,

Matur nuwun

Wassalamualaikum Wr. Wb.