TEMBUNG GARBA BASA JAWA

 Tegese Tembung Garba

Yaiku: Tembung loro (2) sing pungkasane aksara swara (vokal) lan tembung sing wiwitane uga aksara swara (vokal) didadekake siji (1) kanthi ngurangi jumlah wandane (suku kata), amarga ana swara kang dadi luluh.

Tuladha: 

Tembung 1.    Prapta (pungkasane swara a) dumadi saka 2 wanda, prap - ta

                2.    Ing (wiwitane swara i) dumadi saka 1 wanda, ing

Tembung prapta + ing     didadekake siji. Swara a + i  luluh dadi e. Manawa didadekake siji banjur dadi prapteng. Prapteng kalebu tembung garba

Pangrimbag Liyane

1.    a + a            = a        Tuladha:    Wanodya + ayu            = Wanodyayu

 

2.    a + i lan e    = e        Tuladha:    Prapta + ing                  = Prapteng 

                                                          Karya +  enak               = Karyenak

3.    a + u            = o        Tuladha:    Nara + utama                = Narotama

4.    i + i              = i        Tuladha:    Siti + inggil                   = Sitinggil

5.    i + a             = ya      Tuladha:    Dupi + arsa                    = Dupyarsa

6.    i + u lan o    = yo      Tuladha:    Dadi + ujar                    = Dadyojar

                                                           Sami + oncat                 = Samyoncat

7.    u + i            = we       Tuladha:    Tumuju + ing                = Tumujweng

8.    u + a           = wa        Tuladha:    Ratu + agung                = Ratwagung

  

                                                                  

CANGKRIMAN BEDHEKAN BASA JAWA

 1. Tegese Cangkriman

    Manut Bausastra Jawa  bausastra iku bahasa indonesiane padha karo kamus.

Cangkriman asale saka tembung cangkrim sing tegese bedhek utawa batang, dadi cangkriman bisa ditegesi bedhekan utawa batangan. Ana maneh sing negesi manawa cangkriman iku tetembungan, ditata kanthi runtut kang teges utawa isine ngemu karep supaya diwangsuli. Saka katrangan iku  bisa dijupuk dudutane utawa kesimpulane, manawa cangkriman iku  padha karo unen-unen utawa tetembungan sing kudu dibedhek utawa dibatang utawa diwangsuli

2. Gunane Cangkriman

    Cangkriman iku lumrahe mung digunakake kanggo sarana dedolanan utawa gegojekan yen pinuju jejagongan karo kanca ing kalane nganggur. dadi cangkriman iku mung kanggo ngisi wektu pinuju lodhang utawa longgar wae. Nanging ana uga sing nggunakake, manawa cangkriman iku bisa kanggo ing wektu kang wis ditemtokake lan ana ing kahanan kang mirunggan. Ing kene gunane cangkriman wis ora kanggo sarana dedolanan meneh, nanging wis kanggo sarana ngasah pikir supaya luwih lantip utawa pinter.

3. Perangane Cangkriman

    a. Cangkriman pepindhan

    Sing diarani cangkriman  pepindhan yaiku: cangkriman kang awujud ukara kang memper kaya    barang sing dikarepake utawa barang saknyatane.  Dadi cangkriman pepindhan iku pancen cangkriman sing dijumbuhake karo irib-iribane (kemiripan) barang sing dikarepake. Gandheng cangkriman pepindhan iku mau dijumbuhake karo irib-iribene barang sing dikarepake mula cangkriman pepindhan uga bisa diarani cangkriman irib-iriban.

Tuladha:

1.    Pitik walik saba kebon (pitik walik....pitik walik iku pitik sing wulune malik utawa ngener munggah tur saba kebon) kira-kira apa ya? Saweneh barang kang memper karo kahanan pitik walik tur kok saba kebon iku??....ya ... batangane utawa bedhekane  = nanas 

2.    Wujude kaya kebo, ulese kaya kebo, lakune kaya kebo, nanging dudu kebo = (wo...la kok iki kabeh kahanane kaya kebo, nanging kok dudu kebo..., gek apa ya?.... nggih batangane gudel, gudel kuwi apa?...gudel kuwi anak kebo

3.    Tibane ngisor digoleki ndhuwur (iki ana sing aneh meneh...nanging pancen kahanane bener mangkono...tibane ngisor digoleki ndhuwur, iku jawabane ...banyu sing trocoh...coba ....yen ana omah trocoh amarga gendhenge bocor kae, banyune tiba mengisor, nanging sing ngerti banjur ndhangak nggoleki gendheng sing manggone ing ndhuwur)

    b. Cangkriman Blenderan

    Manawa  cangkriman blenderan yaiku cangkriman kang mengku surasa utawa karep nyrekal, amarga pancen tujuwane kanggo nyrekal sing diajak cecangkriman supaya keblender utawa keplesed mbedheke.  Dadi manawa arep mbedhek cangkriman blenderan iki mbutuhake sikap kang ngati-ati, sebab yen ora ngati-ati bakal keblender utawa keplesed temenan.  Iki ora keplesed amarga dalane lunyu ngono kae lho ya...nanging sing dikarepake keplesed tetembungane.

Tuladha:

1. Wong mati ditunggoni  wong nangis. Lo..lo..piye iki mosok ana wong wis mati ditunggoni wong banjur nangis, gek kepriye kuwi??...katrangne ngene...wong matine ya tetep mati...nanging sing nangis iku wong sing nunggu.
2. Wong mati dilumpati kucing urip.  Ing cangkriman iki, yen kowe mengko ora ngati-ati, mula banjur maido...mongsok wong mati dilumpati kucing urip....pranyata sing urip iku kucinge...la yen kucinge mati ya ora bisa mlumpat?
3. Wong dodol tempe padha ditaleni
4. Wong dodol kambil  padha dikpruki

    Ana ing cangkriman Wong dodol tempe padha ditaleni iku sing ditaleni tempene. tempe sing dibuntel godhong kae lho, dudu wong sing dodol tempe.
    Ana ing cangkriman Wong dodol kambil  padha dikpruki, sing dikepruki dudu wonge ...dudu sing dodol....nanging sing kepruke iku kambile.

c. Cangkriman Wancahan

    Tembung wancahan asale saka tembung wancah sing tegese bisa tugel, bisa cekak. Dadi Wancahan tegese tugelan utawa cekakan bahasa Indonesiane padha karo singkatan. Wancahan sing arep kanggo cangkriman iku kudu dijumbuhake karo unine tembung-tembunge. Dadi Cangkriman wancahan iki wujude mung tugelan utawa cekakaning tembung-tembung  sing arep kanggo cangkriman. La... Lumrahe tembung -tembung ing cangkriman iku anggone nugel utawa nyekak kanthi ngilangake wanda utawa suku kata sing ngarep.  Dadi sing dienggo lumrahe mung wanda sing mburi wae.

Tuladha:

1. ling cik tu tu ling ling yu (kok kaya bahasa Mandarin) = maling mancik watu, watuné nggoling malingé mlayu 
2. Pak boletus: Tapak kebo ana lelene satus 
3. Pak bomba pak lawa pak piut: Tapak kebo amba, tapak ula dawa, tapak sapi ciut 
4. Wiwawite lesbadhonge: Uwi dawa wite tales amba godhonge
5. Lut mahe ndhut yu mahe rong: welut omahe ngendhut, yuyu omahe ngerong.

d. Cangkriman kang Awujud Tembang

    Cangkriman kang awujud   tembang iku jan-jane mung cangkriman kang ditata kanthi wujud tembang. Lha, tembang sing dienggo iki lumrahe tembang macapat,  lan sing paling kerep dienggo yaiku tembang macapat pocung. Ananging tembang macapat liyane uga ana, kayata tembang Kinanthi, tembang Pangkur, Asmarandana, lsp.  Banjur, cangkriman kang wujude tembang iki, ana sing saben satembang mung ngemu cangkriman siji, dadi  bedhekan utawa batangane mengko  cacahe ya mung siji. Nanging ana uga sing satembangan iku  cangkrimane   luwih saka siji, lan batangan utawa bedhekane  mesthine ya luwih saka siji.

Tuladha:

1. Tembang Kinanthi

Wonten putri luwih ayu,                                             Ana putri kang ayu
Tan ana ingkang tumandhing,                                    ora ana sing nandhingi
Sariranira sang retna,                                                awake kaya emas
Owah-owah saben ari,                                                bisa owah saben dina
Yen rina kucem kang cahya,                                       yen awan sorote kucem/surem
mung ratri mancur nelahi                                           mung yen bengi sumunar sorote 

Batangane yaiku rembulan.

2. Tembang Pocung

Bapak Pocung gedhene saemper gunung

asale ing Plembang

dedegira ageng inggil

yen lumampah Si Pocung lembehan grana

Batangane yaiku kewan gajah

3. Tembang Pangkur

Badheken cangkriman ingwang                     Bedheke cangkrimanku          

tulung-tulung ana gedhang awoh gori            ana gedhan uwoh gori = ditegori

ana pitik ndhase telu                                       ana pitik ndhase telu   = dibuntel wulu

gandhanana endhasnya                                   gandhenana endhase   = sirahe nggandhen

kyai dhalang yen mati sapa sing mikul          dhalang yen mati sapa sing mikul= kadhal  lan walang

ana buta nunggang grobag                              ana buta nunggang grobag = tebu ditata

    selawe sunguting gangsir                         salawe sungute gangsir = sakler  lawe   

                                                                     (sehelai    benang)

Tuladha cangkriman kang sinawung ing tembang Pangkur kasebut, sacangkriman batangane luwih saka siji.

Saiki gatekna tuladha cangkriman kang sinawung tembang Pocung iki! Apa bedhekane utawa batangane cangkriman iki?

Bapak pocung, gawe geger gawe bingung

asale ing Wuhan

kabeh uwong miris wedi

wong sing nandhang kudu gelem karantina.... 

Jinis Ukara Basa Jawa

 1. Ukara Carita/ andharan (Kalimat Berita)

Yaiku ukara kang isine nyritakake sawijining bab utawa prastawa marang wong liya supaya wong liya ngerti.

      Titikane:         - Kawiwitan aksara gedhe (huruf kapital)

                              - Dipungkasi kanthi tandha waca titik /. /

2. Ukara Pakon (Kalimat Perintah)

Yaiku ukara kang isine prentah marang wong liya supaya nindakake bab utawa pakaryan kaya kang dikarepake sing kongkon.

      Titikane:          - Kawiwitan aksara gedhe (huruf kapital)

                              - Dipungkasi kanthi tandha waca pakon /!/

                              - Ana kang nggunakake tembung-tembung kang oleh   

                                panambang  -en, -a, -ana, -na

3. Ukara Pamenging (Kalimat Larangan)

yaiku ukara kang isini menging marang wong liya supaya ora nindakake pakaryan kang dikarepake

      Titikane:          - Kawiwitan aksara gedhe (huruf kapital)

                              - Dipungkasi kanthi tandha waca pakon /!/

                              - Nggunakake tembung-tembung ; aja, ora kena.

4. Ukara Pangajak (Kalimat Ajakan)

yaiku ukara kang isini ngajak marang wong liya supaya bebarengan  nindakake pakaryan kang dikarepake

      Titikane:          - Kawiwitan aksara gedhe (huruf kapital)

                              - Dipungkasi kanthi tandha waca pakon /!/

                              - Nggunakake tembung-tembung ; ayo, mangga, sumangga.

5. Ukara Pitakon (Kalimat Tanya)

Yaiku ukara kang isine awujud pitakon marang wong liya supaya wong liya menehi ngerti/ mangsuli.

      Titikane:          - Kawiwitan aksara gedhe (huruf kapital)

                              - Dipungkasi kanthi tandha waca pitakon/?/

                        - Nggunakake tembung-tembung pitakon; apa, sapa, kapan,  

                            ing ngendi,  kepriye, pira, lsp.

TATA CARA UPACARA WIYOSIPUN R.A. KARTINI

TATA CARA UPACARA MENGETI DINTEN WIYOSIPUN RADEN AJENG KARTINI, SURYA KAPING SELIKUR (21) WULAN APRIL WARSA KALIH EWU SANGALAS (2019), KAPURWAKAN

1.     Para manggalaning barisan nyiagakaken barisanipun piyambak-piyambak

2.     Manggalaning upacara samekta ing papan upacara

3.     Atur pakurmatan dhumateng manggalaning upacara kapimpin manggalaning barisan ing kanan piyambak

4.     Atur palapuran para manggalaning barisan dhumateng manggalaning upacara

5.     Sesepuh upacara rawuh ing papan upacara, barisan kasiyagakaken

6.     Atur pakurmatan dhumateng sesepuh upacara kapimpin manggalaning upacara

7.     Atur palapuran manggalaning upacara dhumateng sesepuh upacara

8.     Ngibaraken Bendera Merah Putih kalajengaken pakurmatan dhumateng Bendera Merah Putih kapimpin dening manggalaning upacara dipuniringi  lagu Kebangsaan Indonesia Raya

9.     Ngeningaken cipta kapimpin dening sesepuh upacara

10. Waosan teks Pancasila dening sesepuh upacara katirokaken dening sedaya pandherek upacara

11. Waosan Pembukaan Undang-Undang Dasar Negara Republik Indonesia tahun 1945

12. Tanggap wacana sesepuh upacara

13. Anyekaraken lagu wajib nasional :

a.      IBU KITA KARTINI

14. Waosan pandonga

15. Atur palapuran manggalaning upacara dhumateng sesepuh upacara bilih upacara sampun purna

16. Atur pakurmatan dhumateng sesepuh upacara kapimpin dening manggalaning upacara

17. Sesepuh upacara kepareng jengkar saking papan upacara.

18. Atur pakurmatan dhumateng manggalaning upacara kapimpin manggalaning barisan ing kanan piyambak

19.  Manggalaning upacara kepareng nilaraken papan upacara tumuju papan sakawit

20. Upacara purna, manggalaning barisan ambibaraken  pandherek upacara.

TEMBUNG CAMBORAN KAWRUH BASA RINGKES

KAREPE TEMBUNG CAMBORAN

Yaiku: tembung loro (2) sing didadekake siji lan dianggo bebarengan.

Tembung Camboran Manut Wujude

Tembung camboran manut wujude kaperang dadi loro:

1    Tembung Camboran Wutuh

      Tembung-tembung kang didadekake siji katulis wutuh, kabeh lan ganep

      Tuladha: rumah sakit, pager bata, sepatu sandhal, semar mendem, buntut urang, lsp

2.   Tembung Camboran Tugel.

        Tembung-tembung kang didadekake siji katulis saperangan. Karpe katulis sarana diwancah utawa dicekak.

             

      Tuladha: bangjo (abang ijo), Ndhekmu (cendhek lemu), lunglit (balung kulit), ndelpis (kandel tipis) lsp.

Tembung Camboran Manut Tegese

Tembung camboran manut tegese kaperang dadi loro:

1.    Tembung Camboran Tunggal

       Tembung-tembung kang didadekake siji wis ora bisa ditlesih maneh manut tegese tembung-tembunge, Dadi nduwe teges kang anyar, kang beda banget karo teges tembung sadurunge didadekake siji..

        Tuladha: 

        a.    Semar mendem (dudu semar sing mendem, nanging arane panganan)

        b.    Buntut urang (dudu buntute urang sing urip ing kali, nanging arane rambut sing thukul sirah perangan ngisor)

        c.    Parang rusak (dudu parang kang wis rusak, nanging arane motif bathik)

2.    Tembung Camboran Wudhar.

       Tembung-tembung kang didadekake siji isih bisa ditlesih maneh tegese manut tegese tembung- tembung sadurunge.

       Tuladha:

        a.    rumah sakit (rumah kanggo ngusadani wong-wong sing  lar/sakit)

        b.    sepatu sandhal (sandhal kang ana tutupane memper kaya sepatu)

        c.    pager bata (pager sing kagawe sakan bata)

        d.    buku tulis (buku kanggo ditulisi)

    

        

        

        

                        

                          

Ukara Lamba lan Ukara Camboran : katrangan ringkes

1.         Ukara Lamba (Kalimat Tunggal)

            Yaiku ukara kang dumadi saora-orane saka jejere mung siji lan wasesane mung siji (1 pola                     ukara)

Tuladha :                

     Aku maca buku.

                        Adhiku mangan kacang

2.         Ukara Camboran (Kalimat Majemuk)

            Yaiku ukara kang dumadi saka rong (2) ukara lamba utawa luwih  (kadadean saka 2 pola ukara             utawa luwih ).

            Tuladha:

             a.    Aku maca buku (ukara lamba)

             b.    Adhiku mangan kacang (ukara lamba)

            Ukara a lan ukara b didadekake siji, dadine:

             Aku maca buku, dene adhiku mangan kacang.

            Ukara a lan ukara b kang didadekake siji iku banjur diarani ukara camboran

    Panulise/ pandhapuke ukara camboran iku ana 2, yaiku:

-          Katulis kanthi tandha waca koma /, /

        Tuladha:

        a.    Arimbi mangan bakso.

        b.    Suryani mangan soto.

        Ukara a lan ukara b didadekake siji nganggo tandha waca  koma /,/: 

        Arimbi mangan bakso, Suryani mangan soto.

-         Katulis kanthi nggunakake tembung pangiket/ tembung panggandheng (kata sambung/kata hubung)

      Tembung pangiket/ tembung panggandheng iku kayata; lan, dene,   mula, amarga, nanging, manawa, sarta, nalika, jalaran, ewadene, suprandene, lan maneh, kaliyan malih, lsp.

        Tuladha: 

        a.    Burhan ora mlebu sekolah.

        b.    Burhan lara panas.

        Ukara a lan ukara b didadekake siji nganggo tembung pangiket:

        Burhan ora mlebu sekolah amarga lagi lara panas

    Ukara Camboran kaperang ana 2 yaiku:

         Ukara Camboran Wudhar (Kalimat Majemuk Setara)

Yaiku ukara loro utawa luwih kang didadekake siji kanthi kalungguhan kang sejajar (ora ana ukara kang kalungguhane minangka katrangan)

 Tuladha:

a. Aku gawe layangan.

b. Adhiku gawe montor-montoran.

Ukara a lan ukara b banjur didadekake siji. Antarane ukara a lan ukara b kalungguhane sejajar, karepe salah siji ukarane ora dadi katrangan ukara liuane.

      Aku       gawe         layangan,       adhiku       gawe          montor-montoran.

      Jejer     wasesa       lesan              jejer         wasesa       lesan

          Ukara Camboran Sungsun/ Tundha (Kalimat Majemuk Bertingkat)

Yaiku ukara loro utawa luwih kang didadekake siji kanthi kalungguhan kang ora sejajar (dadi ana salah sawijining ukara kang kalungguhane minangka katrangan ukara liyane)

Tuladha:

a.    Maria sregep sinau. 

b.    Maria entuk biji apik.

      Maria     sregep        sianu,     mulane bijine apik.

      Jejer      wasesa       lesan       katrangan

Ukara a lan ukara b didadekake siji, lan ukara b dadi katrangan ukara a (kadhapuk kanthi ngilangake jejer ing ukara b). 

 

Ukara Camboran kang Nunggal Jejer

            Tuladha:

            a.    Maria tuku sepatu.

            b.    Maria tuku tas.

            Ukara a lan ukara b didadekake siji: Maria tuku sepatu lan tuku tas.

        Ukara Camboran kang Nunggal Wasesa

            Tuladha:

            a.    Savira njoged Gambyong.

            b.    Nurani njoged Bondhan.

            Ukara a lan ukara b didadekake siji: Savira njoged Gambyong, Nurani Bondhan.

        Ukara Camboran kang Nunggal Lesan

            Tuladha:

            a.    Burhan nonton bal-balan.

            b.    Sumadi ya nonton bal-balan.

            Ukara a lan ukara b didadekake siji: Burhan nonton bal-balan, Sumadi ya nonton.

NASKAH SIARAN RADIO KARANGANYAR BELAJAR KIDANG KENCANA

 

Assalamualaikum warohmatullohiwabarakatu

Para pamiyarsa/ sutresna radio Swiba ingkang kula urmati/ lan mligine marang anak-anakku/ para siswa SMP/ ing saindhenging laladan Karanganyar lan sakiwa tengene sing taktresnani//

Wilujeng enjing/ ketemu maneh karo ibu Sulistyowati / ing acara  KARANGANYAR BELAJAR/ kaya padatan/ acara iki digiyarake dening Radio Swiba FM/ Radionya Karanganyar/

 

Ing wektu iki mengko/ suwene kurang luwih 30 menit/ Bu Sulis bakal ngajak bebarengan para siswa /nyinau piwulang  utawa MATA PELAJARAN Basa Jawa/ kanthi wosing pasinaon yaiku   Crita wayang Ramayana perangan Kidang Kencana.

Sadurunge  kawiwitan/ Ayo...// Anak-anakku siswa kabeh/ luwih dhisik padha ndedonga bebarengan/ nyenyuwun marang Gusti Kang Maha Kuwasa/ muga tansah pinaringan bagas waras/ tansah rahayu  lan tansah bagya mulya//  Panyuwunan kang mligi/ konjuk marang  ngarsane Gusti Kang Maha Asih/ muga-muga/ kahanan Indonesia/ kang lagi nadhang musibah/ kanthi anane lelara kang disebabake dening VIRUS COVID 19/ enggala bisa bali dadi ayem tentrem maneh//. AAMIIN

O....ya/ kaya padatan/ aja lali/ para siswa nyawisake buku lan piranti kanggo nulis/ mbok menawa/ ana perangan-perangan wigati / kang bakal koktulis/ kanggo nambah kawruhmu//

 

Para siswa/ sadurunge mirengake andharan babagan Crita wayang Ramayana Kidang Kencana / bu Sulis arep paring pitakon  marang para siswaku sing pinter-pinter//... Mesthine/ para siswa/ wis padha tau  krungu lan nonton pentas wayang.//  nggih .... ana sing ngrungokake giyaran wayang lumantar radio // ana sing nonton pentas wayang ing televisi/ malah/ mbok menawa ana sing nonton  pentas wayang  kanthi  langsung//

Pitakone : Sapa paraga wayang sing koksenengi lan apa sebabe kowe seneng marang paraga kasebut??  Para siswa sing daktresnani/  kowe kabeh / mengko bisa atur wangsulan/ kanthi ngirim wangsulan kasebut ing Radio Swiba Radionya Karanganyar // yaiku  lumantar aplikasi WA kanthi  nomer   089 692 161 405//

 

Para siswa... ing ngarep mau wis diandharake// manawa bu Sulis arep paring piwulang / kanthi wosing pasinaon yaiku/ Crita wayang Ramayana   Kidang Kencana// Kanggo mangerteni andharan kang luwih komplit/  mulane/ para siswa bakal dakajak /sinau bebarengan babagan kasebut ing antarane yaiku:

A. Paraga ing Crita wayang Ramayana   Kidang Kencana

B. Ringkesane crita wayang Ramayana   Kidang Kencana

C. Wosing budi pekerti utawa nilai karakter sing bisa kajupuk saka  Crita wayang Ramayana

     Kidang Kencana.

 

Ayo digatekne/ saiki Bu sulis arep wiwiti/ paring andharan   babagan kasebut/

Perangan  A :  

Para paraga ing Crita wayang Ramayana   Kidang Kencana:

1.      Raden Ramawijaya                 : Raden Ramawijaya iku putrane Prabu Dasarata/ kang dadi raja ing kraton ayodya/ karo ibu Dewi Raghu utawa Dewi Kosalya.

2.      Dewi Sinta                              : Dewi Sinta garwane Raden Ramawijaya

3.      Raden Laksmana                     : Raden Laksmana iku adhine Raden Ramawijaya . dadi uga putrane Prabu Dasarata nanging saka ibu Dewi Sumitra

4.      Prabu Rahwana utawa Dasamuka       : Prabu Rahwana utawa Dasamuka iku/ raja  kang awujud raseksa utawa buta/ kang ngratoni nagara Alengka//

5.      Kala Marica                             : Kala Marica iku uga raseksa utawa buta/ abdine Prabu Rahwana kang memba-memba/ salin wujud dadi Kidang Kencana.

Kuwi mau/ para paraga ing Crita wayang Ramayana  Kidang Kencana //

 

Bacute Perangan B: /

Perangan B yaiku reringkesane Crita wayang Ramayana  Kidang Kencana//

Crita wayang Ramayana  Kidang Kencana iku kawiwitan/ nalika Raden Ramawijaya  nindakake darma/ kudu ninggalake kraton Ayodya/ lan manggon ing satengahe alas Dhandhaka//

Para siswa isih kelingan ta....???/ apa sebabe / Raden Ramawijaya  ninggaleke kraton Ayodya / lan banjur manggon/ ing satengahe alas Dhandhaka.....?? Nggih... jalaran/ Raden Ramawijaya/ mung kepengin atur bekti/ marang keng ramane/ yaiku prabu Dasarata//

 

Prabu Dasarata/ kagungan putra cacah  4/ yaiku Raden Ramawijaya saka ibu Dewi Raghu utawa Dewi Kosalya/ Raden Lesmana lan Raden Satrugna/ saka ibu Dewi Sumitra/ sarta Raden Barata/ saka ibu Dewi Kekeyi. //

Nalika semana/ Prabu Dasarata  wis yuswa sepuh/  kepingin masrahake kraton Ayodya/ marang putra kakung sing lair dhisik dhewe/ saka ibu prameswari/ lan sing kudune/ nduweni hak dadi raja/ yaiku Raden Ramawijaya// Ananging/ nalika Raden Ramawijaya arep dijumenengake dadi raja/ Dewi Kekeyi ora trima//  Dewi Kekeyi nagih janji marang Prabu Dasarata / Jalaran/ pancen Prabu Dasarata nate kagungan janji/ marang Dewi Kekeyi// janjine yaiku/ Dewi Kekeyi dikeparengake nduwe panyuwunan cacah 2... lan apa wae panyuwunane/ bakal dikeparengake......Dewi Kekeyi/ ora enggal ngaturake panyuwunan cacah 2 kasebut.... nganti/ nalika Raden Ramawijaya bakal dijumenengake raja/ lagi ngaturake panyuwunane.

Ewadene panyuwunane Dewi Kekeyi yaiku:

1.      Nyuwun marang Prabu Dasarata/ supaya sing dadi raja ing Ayodya iku putrane/ sing asmane Barata

2.      Raden Ramawijaya kudu ninggalake kraton Ayodya  suwene 14 warsa utawa 14 taun.

 

Nah...gek kepriye iki????/ tumrap Raden Ramawijaya/ sing sejatine bakal ngganti dadi raja ing Ayodya/ nalika mireng panyuwune Dewi Kekeyi???... duka?...ora/ gela?...ora....//Raden Ramawijaya/ tetep sabar lan ikhlas nampa sakabehe.....

Ya amarga rasa bektine marang keng ramane/ lan supaya keng ramane/ ora cidra ing janji/ mulane Raden Ramawijaya/  kanthi rasa lila legawa/ minangkani pamundhute ibu kwalone/ yaiku Dewi Kekeyi// Banjur Raden Ramawijaya ninggaleke kraton Ayodya/ kanthi didherekake garwane/ yaiku Dewi Sinta/ lan adhine/ yaiku Raden Laksmana// Katelune banjur manggon ing satengahe alas Dhandhaka.

Bacuting crita / Tetelune / yaiku Raden Ramawijaya, Dewi Sinta, lan Lesmana/ banjur manggon ing satengahe alas Dhandhaka/ kanthi nggawe wangunan omah prasaja/ kang kabeh bebakalane wangunan/ ya mung kajupuk saka alasa kono/ jalaran pancen Raden Ramawijaya/ Raden Laksmana lan Dewi Sinta/ nalika ninggalake kraton Ayodya/.... ora nggawa apa-apa//

 

Nah.....ing sawijining dina/ pinuju  Raden Ramawijaya, Dewi Sinta, lan Lesmana/ lagi padha jejagongan/ ana sawijining kewan kidang/ kang mara nyaketi//  Kidang kasebut mujudake salah sawijining kewan alas/ nanging beda karo kidang-kidang liyane// ulese kulite mrusuh/ kuning nemu giring/ malah bisa diarani/ kuning kaya emas//  polahe trengginas/ kaya nduwe prabawa kang gedhe// Kidang kasebut arane kidang kencana//

 

Kidang mlayu mrana-mrene/ mlumpat-mlumpat/ sajak nggodha ati // Priksa ana kidang/ kang beda karo kidang-kidang liyane/ Dewi Sinta kesengsem// kepencut// pingin kagungan kidang kang endah iku// Mula kanthi ngati-ati / Dewi Sinta ngrekadaya/ nyekel kidang kasebut// Nalika ngerti manawa arep dicekel/ si kidang tansaya mlumpat/ mlayu mrana mrene sajak ngece// Gandheng Dewi Sinta kangelan/ anggone arep nyekel kidang/ mula banjur ngaturi Raden Ramawijaya/ supaya nyekelake kidang// Amarga rasa tresnane marang garwa/ Raden Ramawijaya/ saguh nyekelake kidang/ kang wis mlayu anggendring ninggalake papan kono//

 

Sadurunge tindak  ngoyak  kidang / Raden Ramawijaya pamit marang garwane/ lan paring weling marang Raden Laksamana/ supaya ngreksa utawa njaga/ keslametane Dewi Sinta// Raden Laksmana uga diweling/ ora kena ninggalake Dewi Sinta/ manawa Raden Ramawijaya durung kondur ing papan panggonane // Raden Laksmana matur sendika//

 

Raden Ramawijaya/ enggal-enggal nututi/ lan nggoleki kidang kencana kang mlayu// teruuuus ditutake/ nganti tekan tengah alas gung liwang-liwung// Kanthi ngati-ati/  Raden Ramawijaya ndingkik saka mburine kidang// Kidang sajak ngerti/ manawa ana sing ndingkik/ mula banjur mlayu ngendhani// Raden Ramawijaya/ rumangsa diece dening si kidang// mula banjur nglepasake jemparing (panah)/ kaenenrake prenahe kidang// Kidang kencana kena panahe Raden Ramawijaya/ Kidang kencana ambruk/ jemparing nembus awake kidang//

 

Nanging ana kedadean kang aneh/  kidang kencana kang nandhang tatu/ jalaran kena jemparing mau muksa//...  bebarengan karo muksane kidang/ gumanti karo  metune raseksa/ abdine Prabu Rahwana/ yaiku/ Kala Marica//.... tetela ya Kala Marica iku/ kang memba-memba dadi kidang kencana// dene acas tujuane/ kanggo misahake/ antarae Raden Ramawijaya lan Dewi Sinta// Raden Rama duka/ rumangsa dipaeka/ utawa diapusi/ dening kidang kencana Kalamarica// mula Kala Marica banjur kaperjaya / utawa dipateni dening Raden Ramawijaya// Mbarengi karo patine Kala Marica/ Kala Marica mbengok seruuuu banget/  kanthi ngemperi swarane Raden Ramawijaya// Pambengoke Kalamarica/ kaprungu nganti tekan papan dununge Dewi Sinta//

 

Dewi Sinta/ midhanget swara pambengok sing memper swarane Rama// Dewi Sinta ngira/ iku swara pambengoke Raden Ramawijaya temenan// Tuwuh rasa kuwatir marang keslametane Raden Ramawijaya/ mula banjur dhawuh marang Raden Laksamana/  supaya enggal nusul Raden Ramawijaya// Raden Leksmana ora kersa nusul/ jalaran mau wis diweling karo Raden Ramawijaya/ ora kena ninggalake Dewi Sinta / manawa Raden Ramawijaya durung kondur/  saka anggone ngoyak kidang.

Mireng ature Raden Laksmana/ sing ora kersa nusul Raden Ramawijaya/ Dewi Sinta sajak duka// banjur ngundhamana/ lan ndakwa menawa Raden Laksmana/ kepengin ngajap/ sedane Raden Ramawijaya/ jalaran Raden Laksmana kagungan rasa tresna/ marang Dewi Sinta//

 

Mireng pangandikane Dewi Sinta/ Raden Laksmana cuwa penggalihe/ dene Dewi Sinta/ kagungan pandakwa kang kaya mangkono//  Banjur Raden Laksmana/ saguh nututi lan nggoleki/ Raden Ramawijaya// Sadurunge ninggalake Dewi Sinta/ Dewi Sinta kapapanake ana ing panggonan / kang wis diwenehi rajah/ kanthi piweling/ supaya Dewi Sinta/ ora kena ninggalake papan kang wis karajah mau/ manawa Dewi Sinta/ metu saka panggonan kang wis dirajah/ bakal nemahi bebaya// sewalike / wong liya kang nduwe niyat ala/ uga bakal nemahi bebaya/ samangsa mlebu menyang panggonan kang karajah kasebut//

 

Raden Laksmana banjur ninggalake Dewi Sinta/ nanging sepisan maneh/ Raden Laksmana atur weling marang  Dewi Sinta/ supaya ora  ninggalake papan sing wis karajah/ Sarta matur/ manawa pandakwane Dewi Sinta iku ora bener// Raden Laksmana ora nduwe niyat nresnani Dewi Sinta/  kanggo ngyakinake Dewi Sinta/ manawa Raden Laksmana ora kagungan niyat tresna/ mula Raden Laksmana prasapa utawa sumpa// Prasapane yaiku/ Raden Laksmana bakal nglakoni wadat/ sing tegese/ ora bakal kagungan garwa salawase urip.

 

Raden Laksmana/ kasil ketemu karo Raden Ramawijaya/ banjur didangu/ kenengapa ninggalake Dewi Sinta// Raden Laksmana matur apa anane// Raden Ramawijaya/ bisa nampa ature Raden Laksmana/ lan Raden Ramawijaya uga maringi ngerti/ manawa sejatine kidang kencana iku/ malihane Kala Marica/ abdi kinasihe Prabu Rahwana //

Kalorone/ banjur padha bali ninggalake papan kasebut/ kondur tumuju papane Dewi Sinta.

 

Ing Papane Dewi Sinta/  Dewi Sinta sajak ora nglegewa (nggagas)/ manawa ana sing nggatekake/ yaiku Raja Alengka Prabu Rahwana/ kang niyate/ kepengin nggarwa Dewi Sinta// Prabu Rahwana/ nyedhaki papane Dewi Sinta niyate arep ndhustha / nyolong Dewi Sinta//  nanging ora bisa/ jalaran Rahwana ora bisa mlebu papane dewi Sinta/ sing wis karajah dening Raden Laksmana// Prabu Rahwana ninggalake Dewi Sinta/ banjur malih dadi wong tuwa njejaluk/ kang kahanane memelas banget// Wong tuwa kasebut/ banjur nyedhaki papane Dewi sinta/... matur nyuwun diparingi sedekah// Dewi sinta dhawuh/ supaya wong tuwa njejeluk kuwi mara nyedhak//  nanging wong tuwa kasebut matur ora bisa/ awake lemes lan lara// Mireng ature wong tuwa njejaluk kasebut//... banjur tuwuh rasa welas asihe Dewi Sinta/ nganti lali piwelinge Raden Laksmana / supaya ora metu saka papan kang dirajah//  Dewi Sinta / metu saka papan kang dirajah/ niyate bakal maringi pangan/ marang wong tuwa kang njejaluk// Nanging durung nganti pangan diulungake / wong tuwa njejaluk iku banjur nyaut astane Dewi Sinta/... Dewi Sinta kaglandhang .... digawa mabur // Lan tetela wong tuwa njejaluk iku   malih rupa dadi Raja Ngalengka Prabu Rahwana utawa Dasamuka.

Nah...anak-anakku...iku mau ringkesane crita Ramayana Kidang Kencana//

 

 

 

Prangan C

Wondene perangan C yaiku/ Wosing budi pekerti/ utawa nilai karakter/ sing bisa kajupuk saka  Crita wayang Ramayana Kidang Kencana// Ing crita kasebutakeh tinemu/ nilai-nilai karakter/ utawa wosing budi pekerti/ sing bisa kojupuk/ lan bisa kokanggo/ dadi gegondhelan ana ing uripmu// antarane:

1.      Raden Ramawijaya kanthi  lila legawa ninggalake kraton Ayodya jalaran keng ramane wis kadhung duwe janji marang Dewi Kekeyi.

= Anak kudu tansah bekti lan mituhu marang dhawuh pangandikane wong tuwa

2.      Dewi Sinta tetep ndherek Raden Ramawijaya ninggalake kraton Ayodya sanajan kudu urip prasaja ing satengahe alas Dhandhaka.

= Kudu tansah setya tuhu ngampingi garwa ing kahanan apa wae

3.       Raden Laksmana tetep ndherek Raden Ramawijaya ninggalake kraton Ayodya sanajan kudu urip prasaja ing satengahe alas Dhandhaka

= Kudu tansah asih tresna marang sedulure, tansah tetulung lan tansah ngayomi.

4.      Dewi Sinta priksa kidang banjur kepengin nyekel lan nduweni

= Ora kena gampang kengguh marang barang sing dudu duweke

5.      Raden Ramawijaya saguh lan kersa nyekelake kidang kanggo Desi Sinta

= tansah nyembadani lan mbyantu marang garwa samangsa garwa kagungan panyuwunan

6.      Raden Laksmana ora kersa nusul Raden Ramawijaya sing ngoyak kidang, jalaran wis diweling manawa kudu njaga Dewi Sinta

= Tansah nyekel amanah sing wis ditampa

7.      Dewi Sinta ndakwa marang Raden Laksmana manawa nduwe rasa tresna.

= Ora kena nibakake pandakwa manawa durung ana buktine dadi kudu ngati-ati omongan

8.      Dewi Sinta maringi pangan marang wong tuwa njejaluk

= Tansah nduwe rasa welas asih lan seneg tetulung  marang wong kang mbutuhake

9.      Prabu Rahwana ndhustha utawa nyolong Dewi Sinta sing wis nyata-nyata kagungan garwa.

= Ora kena nduwe tumindak angkara, srakah lan ngrusak angger-anggere bebrayan utawa aturan masyarakat

10.  Kala Marica gelem ngapusi uatawa maeka marang Raden Ramawijaya kanthi malih rupa dadi kidang kencana.

= Tetulung kuwi kudu kanggo kabecikan

 

 

Para siswa... iki mau andharan ngenani Crita wayang Ramayana  Kidang Kencana //

Crita kasebut/  isine ngandharake/ manawa Prabu Rahwana anggone kepingin nggarwa Dewi/ Sinta kanthi maneka cara kang julik/ antarane// kanthi ndhawuhi abdine/ kang aran Kala Marica/ supaya malih dadi kidang kencana /perlune supaya misahake Dewi Sinta lan Raden Ramawijaya//.

 

Anak-anakku para siswa sing taktresnani/ sadurunge takpungkasi// bu Sulis arep mriksani apa ana sing wis kirim wangsulan saka pitakon kang takparingake ing ngarep mau....

......................................................................................................................................

Para siswa... jane isih akeh/ wangsulan-wangsulan sing wis kokkirim// ananging/ amarga winates wektune // mula ya kudu dipungkas//

 

Kanggo mbuktekake/ yen para siswa mau/ tansah mirengake andharan kanthi temenan// Iiki bakal takparingi pitakon // Wangsulan saka pitakon  iki  mengko/ supaya ditulis ing bukumu / manawa wis rampung/ banjur diaturake/ marang bapak utawa ibu guru Basa Jawa/ ing sekolahmu dhewe-dhewe// mesthine lumantar WA utawa aplikasi liyane// Jalaran ing wektu iki/ kowe kabeh durung dikeparengake lelungan/ kanthi ninggalake omah//

Pitakone yaiku:

1. Sapa wae paraga sing bisa kokconto ing crita Ramayana Kidang Kencana, Apa sebabe?

2. Nilai karakter utawa wosing budi pekerti apa sing bisa kokjupuk saka crita Ramayana Kidang   

    Kencana??

Lan marang anak-anakku/ sing isih kepengin gladhen// lan nggarap soal ing crita Ramayana Kidang Kencana/ bisa mbuka link kanthi alamat https://bit.ly/2SruNrE

 

Nah/ Para siswa SMP saindhenging laladan Karanganyar/ lan sakiwa tengene sing daktresnani//

Iki mau/ andharan saka bu Sulis/ ing acara Karanganyar Belajar/ kang kagiyarkae dening Radio Swaba Radionya Karanganyar// Muga-muga ana gunane lan bisa nambah kawruhmu // ing wasana/ Tetep waspada/  khusuk ndedonga lan sengkud makarya/ matur nuwun,/ wilujeng enjing/ Wassalamualaikum warohmatullohiwabarakatuh/